1981-yilda o‘sha vaqtda amalda bo‘lgan AQSH prezidenti Ronald Reyganga suiqasd uyushtirgan amerikalik Jon Xinkli hech qanday shartlarsiz sud nazoratidan ozod qilindi. Bu haqda Xinkli Twitter’da ma’lum qildi, deb yozadi “RBK”.
“41 yil, ikki oy va 15 kundan keyin, va nihoyat, ozodlik!!!” — deb yozdi u.
Xinkli o‘ziga qo‘yilgan cheklovlardan 15-iyun kuni ozod bo‘ldi. Bundan ikki hafta avvalroq esa Kolumbiya okrugi federal sudi sudyasi Pol Fridman uni hibsdan ozod etgan edi.
Sobiq prezident Ronald Reyganga suiqasdni Xinkli 1981-yil 30-martda amalga oshirgan. U davlat rahbari Vashingtondagi Hilton mehmonxonasidan chiqayotgan paytda unga o‘q uzib, o‘pkasiga tekkizgan edi. Reygandan tashqari, Oq uy matbuot kotibi, maxfiy xizmat agenti va politsiyachi ham yaralangandi. CBS News ma’lumotlariga ko‘ra, Xinkli psixoz kasalligiga chalingan bo‘lib, o‘zi ishqiboz bo‘lgan aktrisa Jodi Fosterning e’tiboriga tushmoqchi bo‘lgan.
1982-yilda sud uni aqli noraso deb topdi va ruhiy kasalliklar shifoxonasiga majburiy davolanish uchun yubordi, u 2016-yilgacha o‘sha yerda qoldi. So‘ng Xinkliga Virjiniya shtati Uilyamsberg shahridagi keksa onasining uyiga ko‘chib o‘tishga ruxsat berishdi, ammo unga ma’lum bir shartlarni yuklashdi. Xususan, u uyidan 50 mil (80 km)dan ko‘proq masofaga uzoqlashishi taqiqlangandi, mutaxassislar uning telefoni tarkibini kuzatib borardi. Shuningdek, Xinkli haftada kamida bir marta psixoterapiya seanslariga borishi shart edi, ijtimoiy tarmoqlarda akkauntlar ochishi va internetga qandaydir materiallar yuklashi man qilingandi.
Ronald Reygan 1981-yildan 1989-yilgacha AQSH prezidenti bo‘lgan. U dastlab professional aktyor bo‘lgan, so‘ng Kaliforniya gubernatoriga aylangan. 1980-yilda u AQSH prezidenti lavozimiga saylangan. U davlat rahbari bo‘lgan davrda SSSR Afg‘onistonda harbiy operatsiya o‘tkazgan, “Eron-kontras” siyosiy mojarosi ham o‘shanda yuz bergan. 1987-yilda, Reygan hokimiyat tepasida bo‘lgan paytda, Vashingtonga KPSS (Sovet ittifoqi kommunistik partiyasi) Markaziy qo‘mitasi bosh kotibi Mixail Gorbachyov tashrif buyurgan. Uchrashuv yakunlari bo‘yicha mamlakatlar o‘rtasida O‘rta va kichik masofali raketalarni yo‘q qilish haqidagi shartnoma tuzilgan. 1988-yilda Reygan Moskvaga kelgan. U 2004-yilda Alsgeymer kasalligi oqibatlaridan vafot etgan.
Izoh (0)