Qashqadaryo viloyatida sodir bo‘lgan yo‘l-transport hodisasi oqibatida bir nafar yo‘lovchi vafot etdi, deb xabar beradi viloyat IIB axborot xizmati.
Ma’lum qilinishicha, 16-iyun kuni soat 05:30 larda haydovchi A.S. Nexia rusumli avtomashinasi bilan Qarshi shahar aylanma yo‘lidan Samarqand viloyati tomonga harakatlanib kelayotgan bo‘lgan. Yengil mashina haydovchisi “Bog‘obod” MFY hududidagi “Sharshara” choyxonasi oldidagi chorrahada burilib olish vaqtida qarama-qarshi tomondan harakatlanib kelayotgan haydovchi A.T. boshqaruvida bo‘lgan “Zil-130” rusumli yuk avtomashinasi uning old qismidan urib yuborgan.
Oqibatda Nexia avtomashinasi salonida bo‘lgan yo‘lovchi N.O‘. olgan tar jarohati tufayli shifoxonada ko‘rsatilgan tez tibbiy yordamga qaramasdan vafot etgan.
Hozirda mazkur holat yuzasidan Qarshi tumani IIB Tergov bo‘limi tomonidan tergovga qadar surishtiruv harakatlari olib borilmoqda.
Avvalroq Qashqadaryoda boshqaruvni yo‘qotgan Nexia ag‘darilib ketgani, Toshkentda Matiz daraxtga urilishi oqibatida haydovchi va yo‘lovchi halok bo‘lgani, Jizzaxda katta tezlikda harakatlangan Lacetti avtomobili Nexia-3 va Damas bilan to‘qnashgani to‘g‘risida xabar berilgandi.
Izoh (0)