Ijtimoiy tarmoqlarda Ishxiton tumanida ona va bola bir ayolni “samosud” qilgani tasvirlangan video tarqaldi. Samarqand viloyati IIBning ma’lum qilishicha, holat bo‘yicha tergov harakatlari boshlangan.
Videoda ona o‘g‘li bilan boshqa bir ayolni kaltaklagani, uni tepib, qo‘lini qayirgani tasvirlangan. Atrofdagi fuqarolarning ayol kishini urmaslikni so‘rab aytgan gaplariga yigit “otasi urganda nega aralashmagansizlar? U mendan qochib yuribdi”, deya javob qaytargan.
Samarqand viloyati IIB matbuot kotibiga ko‘ra, videodagi holat Ishtixon tumanining “Orlot” MFY hududidagi fermer xo‘jaliklaridan birida sodir bo‘lgan. Ushbu fermer xo‘jaligidagi yer maydonidan ijarachi sifatida foydalanib kelayotgan ayollar o‘rtasida yuzaga kelgan o‘zaro kelishmovchilik janjalga aylanib ketgan. Janjalga ijarachi ayolning o‘g‘li ham aralashib, ikkinchi ijarachiga tan jarohatlari yetkazgan.
Holat yuzasidan Ishtixon tumani IIB Tergov bo‘limi tomonidan Jinoyat kodeksining 277-modda (bezorilik) 2-qismi bilan jinoyat ishi qo‘zg‘atilgan. Hozirda tergov harkatlari olib borilmoqda.
Avvalroq Qashqadaryoda o‘g‘irlik qilgan fuqaro “samosud” qilingan edi. Mazkur holat yuzasidan furqaroga nisbatan jinoyat ishi qo‘zg‘atilib, qamoqqa olish tarzidagi ehtiyot chorasi qo‘llanilgan.
Izoh (0)