Coca-Cola kompaniyasining Rossiyadagi distribyutori (ishlab chiqaruvchi nomidan mahsulotlarni sotish va kafolatli xizmat ko‘rsatish bilan shug‘ullanadigan korxona yoki shaxs) Coca-Cola HBC (Coca-Cola Hellenic) endi Rossiyada Coca-Cola va brendning boshqa ichimliklari ishlab chiqarmasligi va sotilmasligini ma’lum qildi.
Bayonotda aytilishicha, distribyutorning Rossiyadagi barcha xaridorlari hozirda ichimlik zaxiralarini bo‘shatish jarayonida, deb xabar bermoqda Reuters.
Rossiyada Coca-Cola HBC Coca-Cola va uning kichik turlaridan tashqari Fanta, Sprite, Powerade, Schweppes, Burn, BonAqua water, Добрый sharbati, Pulpy, Rich, Моя Семья, Innocent va boshqa mahsulotlarni ishlab chiqaradi.
Coca-Cola HBC Russia kompaniyasi The Coca-Cola Company brendlari ostida eng yirik ichimliklar ishlab chiqaruvchilardan biri bo‘lgan Coca-Cola HBC guruhining bir qismidir. Rossiyada kompaniyaning jami o‘nta zavodi mavjud.
Mart oyida Coca-Cola Ukrainadagi harbiy amaliyotlar tufayli Rossiyadagi faoliyatini vaqtincha to‘xtatayotganini e’lon qilgan edi. The Coca-Cola Company bosh direktori Jeyms Kvinsi may oyi boshida kompaniya Rossiya bozoridan butunlay chiqib ketishi mumkinligini istisno qilmagandi.
Izoh (0)