Ozarbayjon prezidenti Ilhom Aliyev Armaniston tomonini Tog‘li Qorabog‘ maqomi masalasini ko‘tarishni to‘xtatishga chaqirdi va Qorabog‘ hududining so‘zsiz Ozarbayjonga tegishli ekanligini ta’kidladi. Bahsli mintaqa maqomi haqidagi har qanday bayonot, Aliyevning fikricha, muammolarga olib keladi va Ozarbayjon tomonidan tarixni qayta yozishga urinish sifatida baholanadi.
“Tog‘li Qorabog‘ning maqomi masalasi ko‘tarilmasligi haqida og‘zaki kelishuv bor edi. Ammo, afsuski, biz Armaniston hukumatining Tog‘li Qorabog‘ maqomi haqidagi bayonotlarini eshitamiz, bu kelishuvga mutlaqo teskari. Tog‘li Qorabog‘ mavjud emas. Tog‘li Qorabog‘ avtonom viloyati 1991-yil oxirida Ozarbayjon parlamenti qarori bilan tugatilgan. Bizning hududimizda bunday ma’muriy tuzilma yo‘q”, — dedi prezident Aliyev Boku global forumidagi chiqishida.
“Agar Armaniston bizning hududiy yaxlitligimizni shubha ostiga qo‘yishda davom etsa, Ozarbayjonning Armaniston hududiy yaxlitligini shubha ostiga olishdan boshqa chorasi qolmaydi”, — deydi Ilhom Aliyev
Shuningdek uning qo‘shimcha qilishicha “Ozarbayjon “tarixiy nuqtayi nazardan” Armaniston hududlariga da’vo qilish uchun ko‘proq huquqlarga ega, chunki 1920-yilning noyabrida sovet hukumati “mamlakatimizning tarixiy qismi — Zangezurni tortib olgan va Armanistonga qo‘shib bergan”.
Qisqa nisbiy barqarorlashuvdan so‘ng 2022-yilning mart oyida Tog‘li Qorabog‘ maqomi atrofidagi vaziyatning qayta keskinlashishi boshlangan edi. Aprel oyida Armaniston hukumati Ozarbayjonning hududiy yaxlitligini tan olishga tayyorligini bildirgan, shundan so‘ng poytaxt Yerevanda norozilik harakati kuchaygandi.
Mavzuga doir:
- “Ozarbayjon o‘z manfaatlari hisobga olinmasa, Armanistonning hududiy yaxlitligini tan olmaydi” — Ilhom Aliyev
- Pashinyan va Aliyev tashqi ishlar vazirlariga tinchlik muzokaralariga tayyorgarlik ko‘rishni buyurdi
- Rossiya Ozarbayjon o‘z qo‘shinlarini Tog‘li Qorabog‘dagi qishloqdan olib ketganini ma’lum qildi. Boku buni rad etmoqda