Xitoyning 150 ga yaqin kompaniyalari audit bo‘yicha joriy qilingan yangi qoidalar tufayli delistingga uchrashi yoki AQSH birjasidan o‘z xohishiga ko‘ra chiqib ketishi mumkin. Bu haqda Yaponiyaning Nikkei agentligi xabar tarqatgan. AQSHda mazkur qoidalar 2020-yil oxirida qabul qilingandi.
Yangi qonun bo‘yicha xorij emitentlariga qo‘ygan talabga muvofiq ular o‘z davlatlarida hukumat yoki unga qarashli tashkilotga tegishli emasliklarini isbotlaydigan dalil taqdim etishi talab qilinadi.
“Agar AQSHda kompaniyalarning ommaviy hisobdorligini nazorat qiluvchi qo‘mita emitentlar hisobotini tekshira olmasa emitent tegishli hujjatlarni taqdim etishga majbur. Agar qo‘mita emitentning hisobotlarini ketma-ket uch yil ichida tegishli tekshiruvdan o‘tkaza olmasa, u holda xorij kompaniyasining AQSH milliy birjalaridagi aksiyalari savdosi taqiqlanadi”,— deyilgan qonunda.
Avval ma’lumotlarni taqdim etishning eng oxirgi vaqti 2024-yil deb belgilangan bo‘lsa, Nikkei xabariga ko‘ra amerikalik kongressmenlar ushbu muddatni 2023-yilga surishni istamoqda. Ya’ni xorij kompaniyalari joriy yil oxirigacha vakolatli organga hisobot topshirishi yoki ularning aksiyalari sotiladigan AQSH birjasini tark etishi lozim.
O‘tgan haftada Xitoyning Didi taksi xizmatlari servisi OTC ichki bozorida birjada savdo qilishni boshladi va Nyu-Yord fond birjasidan chiqib ketdi. Nikkei agentligi o‘nlab Xitoy kompaniyalari, xususan Baidu internet qidiruv portal ham Didi ortidan borishi mumkinligini taxmin qilgan.
Izoh (0)