АҚШ Украинага таркибида кемага қарши Harpoon ракеталари бўлган янги ҳарбий ёрдам пакетини юборади

Harpoon кемага қарши ракеталари 650 миллион долларлик янги ҳарбий ёрдам пакетининг бир қисми бўлади. Пентагон раҳбари Украинани ўзини ўзи ҳимоя қилиш воситалари билан таъминлашда қатъиятли эканини маълум қилди.

«15 июнь куни АҚШ маъмурияти Украинага қиймати 650 миллион доллардан ортиқ бўлган яна бир қурол партияси, жумладан, Harpoon кемага қарши ракеталари топширилиши ҳақида эълон қилади», дея хабар бермоқда Bloomberg нашри вазиятдан хабардор манбаларга таяниб.

Bloomberg манбаларидан бирининг сўзларига кўра, 320 миллион доллар радиожиҳозларига, 55 миллион доллар тунги кўриш оптикасига, 160 миллион доллар эса машғулотларга сарфланади.

Reuters ахборот агентлигининг аниқлик киритишича, 650 миллион долларлик пакет, Украина хавфсизлигига кўмаклашиш ташаббуси (УСАИ) орқали молиялаштириладиган 1 миллиард долларлик қутқарув дастурининг бир қисмидир. 350 миллион долларлик бошқа қуроллар АҚШнинг ортиқча ҳарбий техника захираларидан юборилади. Улар орасида реактив ракета тизимлари учун ракеталар ва М777 гаубицалари учун снарядлар мавжуд.

Аввалроқ 15 июнь куни АҚШ Мудофаа вазири Ллойд Остин Киевга ёрдам кўрсатишни мувофиқлаштирувчи ғарбий гуруҳнинг Брюсселда давом этаётган тадбирида йиғилиш иштирокчилари «Украинани ўзини ҳимоя қилиши учун зарур бўлган воситалар билан таъминлаш борасидаги қатъияти туфайли тўпланганини» маълум қилган эди.

Пентагон раҳбари, шунингдек, Украина «жанг майдонида бурилиш даврини бошдан кечираётганини» таъкидлаган.

«Украинанинг ўзини ҳимоя қилиш бўйича умумий мажбуриятлар доирасида ҳаракатни кучайтиришимиз ва Украина ўзи, фуқаролари ва ҳудудини ҳимоя қилиши учун янада кўпроқ ҳаракат қилишимиз керак», — дейди Остин.

Май ойининг охирида Остин Дания Украинага ҳарбий қурилмалар ва Harpoon ракеталарини етказиб беришини эълон қилганди. 9 июнь куни Украина мудофаа вазири Алексей Резников ракеталар аллақачон хизматга кирганини, улар қирғоқ мудофаасини кучайтирганини айтди.