Rossiya Moliya vazirligi yangi sanksiyalar xavfida xoli bo‘lish maqsadida budjet hisobdorligi bo‘yicha ma’lumotlarning muayyan qismini e’lon qilishni taqiqladi. Bu haqda vazirlikdagi manbaga tayanib, “RIA Novosti” xabar bergan.
AQSH, Yevropa ittifoqi, Buyuk Britaniya va Rossiyaga do‘st bo‘lmagan boshqa xorij mamlakatlar, muayyan shaxslar tomonidan bosimning ortib ketayotgani tufayli budjet hisobdorligini shakllantirishga oid ayrim axborotlarni tarqatish qisman cheklandi. Bu qo‘shimcha sanksiyalar ehtimolini kamaytirishga yordam beradi.
“RIA Novosti” nashrining qayd etishicha 14-iyun kuni Rossiya Moliya vazirligi budjet daromadlari, xarajatlar va budjet profitsiti miqdorini e’lon qilgan, 2022-yilning besh oyi davomida taxminiy hisob-kitoblar bo‘yicha Rossiyada budjet profitsiti 1,495 trillion rublni tashkil etgan.
Vazirlik budjet defitsitini moliyalashtirish manbalari haqidagi ma’lumotni, budjet va davlat dasturlari ijrosi uchun xarajatlar, shuningdek, avvalgi oylarda budjet ijrosi uchun sarflangan pullar miqdorini oshkor qilmagan.
The Bell nashri Rossiya Moliya vazirligining aprel oyidagi statistikasida mamlakatning neft-gaz daromadlari yillik hisobda 18 foizga qisqargani, “Milliy mudofaa” bo‘limi uchun sarf-xarajatlar esa aprel bilan taqqoslaganda 130 foizga ortganini qayd etgan.
May boshida Rossiya Moliya vazirligi sanksiyalarga uchragan yoki taqiqlar xavfi ostida turgan yuridik shaxslar to‘g‘risidagi ma’lumotlarni e’lon qilmaslik, ular haqidagi axborotlarni cheklash taklifini bildirgan.
Izoh (0)