“Ezgu amal” xayriya jamoat fondi tashabbusi bilan “Taskin” nomli birinchi bolalar hospisi loyihasi ishlab chiqildi. Loyiha Sog‘liqni saqlash vazirligi, Isroilning O‘zbekistondagi elchixonasi hamda “Sheba” klinikasi bilan hamkorlikda amalga oshirilmoqda.
“Daryo” muxbirining xabar berishicha, Toshkent shahridagi “Ground Zero kitoblar olami” majmuasida hospis xodimlarini o‘qitish bo‘yicha seminar-trening o‘tkazilmoqda. Bu jarayon 12 kun davom etadi.
Ta’kidlanishicha, mazkur loyiha hukumatning 2019-yil 24-oktabrdagi “Onkologik xizmatni yanada rivojlantirish va onkologik kasalliklarning kechki bosqichlarini boshidan o‘tkazayotgan bemorlarga tibbiy-psixologik yordam ko‘rsatishni takomillashtirish bo‘yicha qo‘shimcha chora-tadbirlar to‘g‘risida”gi qaroriga asosan ishlab chiqilgan.
“Hospis bu — hayotni sevuvchilar, uning har bir daqiqasini qadriga yetuvchilar uyi. “Taskin” — O‘zbekistondagi og‘ir bemor bolajonlar uchun yaratilgan birinchi hospis bo‘lib, unda kasal bolajonlar va yaqinlariga yashash uchun yaxshi sharoit, ijtimoiy, tibbiy, psixologik hamda ruhiy yordam ko‘rsatiladi.
Mamlakatimizdagi birinchi bolalar hospisini shakllantirish, hospis xodimlarini malakasini oshirish, ularni har qanday holatga shay bo‘lishga tayyorlash, bolalarga mehrli bo‘lish ko‘nikmalarini shakllantirish maqsadida seminar-trening o‘tkazilmoqda”, — deydi “Ezgu amal” xayriya jamoat fondi direktori Munira Xo‘jaxonova.
Treningda sog‘liqni saqlash vaziri o‘rinbosari Elmira Bositxonova, Isroilning O‘zbekistondagi elchisi Zehavid Ben-Hillel, OAV vakillari va volontyorlar ishtirok etdi.
Ma’lum qilinishicha, “Taskin” birinchi bolalar hospisining ochilish marosimi iyul oxirida o‘tkazilishi rejalashtirilgan.
Izoh (0)