«Эзгу амал» хайрия жамоат фонди ташаббуси билан «Таскин» номли биринчи болалар ҳосписи лойиҳаси ишлаб чиқилди. Лойиҳа Соғлиқни сақлаш вазирлиги, Исроилнинг Ўзбекистондаги элчихонаси ҳамда «Шеба» клиникаси билан ҳамкорликда амалга оширилмоқда.
«Дарё» мухбирининг хабар беришича, Тошкент шаҳридаги «Ground Zerо китоблар олами» мажмуасида ҳоспис ходимларини ўқитиш бўйича семинар-тренинг ўтказилмоқда. Бу жараён 12 кун давом этади.
Таъкидланишича, мазкур лойиҳа ҳукуматнинг 2019 йил 24 октябрдаги «Онкологик хизматни янада ривожлантириш ва онкологик касалликларнинг кечки босқичларини бошидан ўтказаётган беморларга тиббий-психологик ёрдам кўрсатишни такомиллаштириш бўйича қўшимча чора-тадбирлар тўғрисида»ги қарорига асосан ишлаб чиқилган.
«Ҳоспис бу — ҳаётни севувчилар, унинг ҳар бир дақиқасини қадрига етувчилар уйи. «Таскин» — Ўзбекистондаги оғир бемор болажонлар учун яратилган биринчи ҳоспис бўлиб, унда касал болажонлар ва яқинларига яшаш учун яхши шароит, ижтимоий, тиббий, психологик ҳамда руҳий ёрдам кўрсатилади.
Мамлакатимиздаги биринчи болалар ҳосписини шакллантириш, ҳоспис ходимларини малакасини ошириш, уларни ҳар қандай ҳолатга шай бўлишга тайёрлаш, болаларга меҳрли бўлиш кўникмаларини шакллантириш мақсадида семинар-тренинг ўтказилмоқда», — дейди «Эзгу амал» хайрия жамоат фонди директори Мунира Хўжахонова.
Тренингда соғлиқни сақлаш вазири ўринбосари Элмира Боситхонова, Исроилнинг Ўзбекистондаги элчиси Зеҳавид Бен-Ҳиллел, ОАВ вакиллари ва волонтёрлар иштирок этди.
Маълум қилинишича, «Таскин» биринчи болалар ҳосписининг очилиш маросими июль охирида ўтказилиши режалаштирилган.