14-iyun kuni Oliy Majlis Qonunchilik palatasidagi O‘zbekiston “Milliy tiklanish” demokratik partiyasi fraksiyasining navbatdagi yig‘ilishi bo‘lib o‘tdi. Unda deputatlar dastlab “O‘zbekiston Respublikasi Ma’muriy javobgarlik to‘g‘risidagi kodeksining 206-1-moddasiga o‘zgartish kiritish haqida”gi qonun loyihasini birinchi o‘qishda muhokama qildi. Bu haqda Quyi palata matbuot xizmati xabar berdi.
Ta’kidlanishicha, tazyiq va zo‘ravonlikdan jabrlagan xotin-qizlarga davlat himoyasini taqdim etuvchi, ularga tazyiq o‘tkazayotgan yoki zo‘ravonlik sodir etayotgan shaxslarga nisbatan ta’sir o‘tkazish choralari qo‘llanishiga sabab bo‘ladigan himoya orderi berilishiga qaramasdan, bunday holatlar soni kamaymayapti.
Misol uchun, 2020-yilda xotin-qizlarga 14 774 ta himoya orderi berilgan bo‘lsa, 2021-yilda bu ko‘rsatkich 39 343 tani tashkil etgan. Himoya orderi talablarini bajarmaslik bo‘yicha esa 1 210 ta holat aniqlangan.
Qonun loyihasida xotin-qizlarga nisbatan tazyiq va zo‘ravonlik o‘tkazilishining oldini olish va ularning huquqlarini himoya qilish maqsadida Ma’muriy javobgarlik to‘g‘risidagi kodeksning 206-1-moddasi sanksiyasida belgilangan jarima miqdorining oshirilishi nazarda tutilmoqda. Hozirda ushbu moddada nazarda tutilgan javobgarlik bo‘yicha aybdor BHMning 3 baravarigacha (900 ming so‘mgacha) jarimaga tortiladi.
Fraksiya a’zosi Alisher Hamroyev qonun loyihasiga munosabat bildirib, jarimani oshirish bilan bunday holatlarni kamaytirib bo‘lmasligini ta’kidlagan. Uning aytishicha, jarimadan butun oila budjeti zarar ko‘radi va bu oilaviy muhitni battar izdan chiqaradi. Shuning uchun ayoliga qo‘l ko‘taradigan erkaklarni jazolashning boshqa yo‘lini topish kerak.
Qizg‘in muhokamalardan so‘ng fraksiya a’zolari qonun loyihasini konseptual jihatdan ma’qullagan.
“Qadriyatlarimizda bu muammoga yechim bor. Oilada erkakning ham, ayolning ham mas’uliyati bor. Er-xotin oilada bir-birini hurmat qilsa, himoya orderiga zarurat ham qolmaydi. Jazolash bilan oilani saqlab qolib bo‘lmaydi”, — deydi fraksiya rahbari Alisher Qodirov.
Unga ko‘ra, himoya orderi talablarini bajarmaslik uchun belgilangan bazaviy hisoblash miqdorining bir baravaridan uch baravarigacha miqdordagi jarimani – besh baravaridan o‘n baravarigacha etib belgilash taklif qilinmoqda.
Oliy Majlis Qonunchilik palatasi devoni mas’ul xodimi Behzod Sultonovga ko‘ra, himoya orderi talablarini bajarmaslik uchun belgilangan jarimani – besh baravardan o‘n baravarigacha (3 million so‘mgacha) etib belgilash taklif qilinmoqda.
Eslatib o‘tamiz, 2020-yilda xotin-qizlarni tazyiq va zo‘ravonlikdan himoya qilish bo‘yicha prezident qarori qabul qilingan. Hujjatga asosan, tazyiq va zo‘ravonlikdan jabrlangan ayollarga himoya orderi berish tartibi tasdiqlangan. Shuningdek, xotin-qizlarga gap otganlarni javobgarlikka tortish taklif qilingan edi
Izoh (0)