Qozog‘istonning Atirau shahridagi Aholiga xizmat ko‘rsatish markaziga mingga yaqin O‘zbekiston fuqarolari yog‘ilib kelayotgani to‘g‘risida xabar berilgandi. “Dunyo” agentligining yozishicha, vaziyat O‘zbekistonning mamlakatdagi Bosh konsulxonasi tomonidan nazoratga olingan.
O‘zbekiston fuqarolari Rossiya bilan chegara yopiq bo‘lgani sababli Qozog‘istonda vaqtinchalik ishlash uchun ruxsatnoma olmoqchi bo‘lyapti. Ular o‘z pasportlarini yangilagani tufayli vaqtinchalik ishlash uchun qaytadan ruxsatnoma olishi zarur. Shu sababli markazda erta tongdan kechgacha navbatlar kuzatilmoqda.
“Avvallari Qozog‘istonda ishlash uchun ruxsatnoma Migratsiya politsiyasi boshqarmasi xodimlari tomonidan berilgan bo‘lsa, endi Mehnat vazirligi tomonidan berilmoqda. Shu sababli barcha chet elliklar Aholiga xizmat ko‘rsatish markazlariga borib, hujjatlarini topshirmoqda. O‘zbekistonda chet elga chiqish pasporti joriy qilindi, oddiy pasport bilan endi chet elda ishlashga ruxsat berilmaydi. Agar bizning bazamizda ularning yashil pasporti turgan bo‘lsa, birdan rad javobi olishadi”, — degandi “Hukumat fuqarolar uchun” davlat korporatsiyasi Atirau filiali boshlig‘i o‘rinbosari Jalgas Jarasov.
Ma’lum qilinishicha, 13-iyun kuni bosh konsul Otabek Tursinbekov Atirau shahridagi Fuqarolarga xizmat ko‘rsatish markazidagi vaziyat bo‘yicha markaz rahbari Musa Xayrulliyev bilan telefon orqali muloqot qilgan. Aniqlanishicha, hozirgi paytda markazda fuqarolarni qabul qilish bo‘yicha xodimlar soni 10 nafardan 26 nafarga ko‘paytirilgan, fuqarolarni qabul qilish vaqti esa soat 00:00 ga qadar uzaytirilgan.
Shu vaqtga qadar 1,1 ming nafar fuqaroning hujjatlari qabul qilinib, shundan 800 nafarining hujjatlari ko‘rib chiqilib, ijobiy hal qilingan. Mazkur masala bo‘yicha Qozog‘iston Raqamli rivojlantirish, innovatsiyalar va aerokosmik sanoati vazirligidan ham vakillar kelishib, markazdagi vaziyat o‘rganilgan va nazoratga olingan.
“Mahalliy hokimiyat ham ushbu masalani ijobiy hal qilish bo‘yicha barcha choralarni ko‘rmoqda”, — deyiladi xabarda.
Atirau shahridagi O‘zbekiston fuqarolarini rasmiy ro‘yxatga olish jarayoni bilan bog‘liq vaziyat Atirau viloyati hokimiyati va vakolatli idoralari hamda mamlakatdagi Bosh konsulxona tomonidan doimiy nazoratga olingan.
Izoh (0)