Жиноят ишлари бўйича Самарқанд шаҳар суди ўзини блогер сифатида таништириб, фуқароларнинг муаммоларини ҳал қилиб бериши эвазига пул олиб, алдаб келган блогер ишини кўриб чиқмоқда. Бу ҳақда суд ишида қатнашган «Дарё» мухбири Фарҳод Норбўтаев хабар бермоқда.
Судья Маъруф Рўзиев раислигида ўтказилган судда жабрланувчи — Андижон вилояти Избосган туманида яшовчи фуқаро Муроджон Қурбонов ва Солижон Мирзаевларнинг сўзи тингланган.
«Ошнам Солижон Мирзаев уйимни сотиб берадиган блогер бор экан, шуларни гаплашсак нима бўлади деди. 2021 йилнинг 24 декабрь куни Ў.Ч. Наманганга судга келган экан. Суддан сўнг мен, дўстим, Ў.Ч. ҳамда унинг аёли судни олдидаги ошхонада овқатландик. У ерда Ў.Ч.га уйим қиммат эканлигини айтиб, ‘шуни реклама қилиб бериш қўлингиздан келадими йўқми’, деб сўрадим. У эса қўлидан келмайдиган ишнинг ўзи йўқлигини айтди. Шундан сўнг Избосканга уйни кўришга бордик», — дейди Муроджон Қурбонов.
Унинг айтишича, Ў.Ч. шундан сўнг унга банкка бориб пластик карточка очиши кераклигини, 2022 йилнинг 6 январь куни эса шартнома тузиши лозимлигини айтган.
«2022 йилнинг 5 январь куни дўстим Солижон Мирзаев қўнғироқ қилиб Ў.Ч. Андижонга келганлигини, ҳозир меҳмонхонада турганлигини айтди. У ерга бориб меҳмонни уйга олиб келдик. Уйни расмга олишди. 6 январь куни яна уйга олиб келдик. Шу куни шартнома тузиш кераклиги ҳақида айтди. Унгача пул тўғрисида умуман гап бўлмаганди. Дўстим Собир Мирзаевга ‘Тараққиёт Медиа’ муҳри урилган шартномани кўрсатишди. Шартномада реклама бериш бўйича бирорта пунктини кўрмадим. Мен Ў.Ч.га шартномада реклама бериш бўйича пунктлари бўлмаганлигини айтганимда, ‘мен айтиб тураман ручка билан ёзиб киритамиз’, деди. Бизни ишонтирганлиги учун 1000 доллар бердик. Бизга рекламани ташлади. У уй бизнинг уйимиз эмасди. Ўша реклама ҳам монтажсиз, расво қилиб берилган. Биз тезда Ў.Ч.га қўнғироқ қилиб, рекламадан қониқмаганлигимизни, уни олиб ташлаш кераклигини айтдик», — дейди Муроджон Қурбонов.
Судланувчи Ў.Ч. даъвогарларнинг гапига жавобан уларни алдаш нияти бўлмаганлигини, «агар шундай нияти бўлганда, яшаш манзилим ҳақида маълумот бермаган бўлардим», деди.
«Наманганда гаплашганимизда реклама ҳақида айтганман. Қолаверса у менга реклама учун пул берган. Муроджон Қурбонов ижтимоий тармоқ орқали мени йўқ қилиб юбориши ҳақида видео қўйган. Бу бўйича Андижон вилояти Избоскан туман прокуратураси томонидан жиноят иши очилган. Мен ўзимни ўзим ва оиламни бандлигини таъминлаб келяпман. Давлатдан иш бер деб юрганим йўқ. Нега мени излаб Наманганга борди. Мен уни мажбурлаб Наманганга юр деганим йўқ. Унинг ўзи мени излаб телефон рақамимни топган», — деди судланувчи Ў.Ч.
35 ёшли У.Чоршанбиев 2021 йилнинг август ойида фуқаро Д.Р.га ўзининг блогерлигини айтиб, 600 доллар эвазига уй-жой масаласи бўйича Фуқаролик ишлари бўйича Паст Дарғом туман судида кўрилаётган ишни ижтимоий тармоқларга жойлаш орқали ижобий ҳал қилиб беришни ваъда қилган. У 2 миллион сўм миқдоридаги пулларини олиб, ўзининг эҳтиёжларига ишлатиб юборган.
Бундан ташқари, У.Чоршанбиев ўзининг жиноий ҳаракатларини давом эттириб, 2021 йил 7 сентябрь куни фуқаро Ю.Д.дан 2 минг доллар эвазига унинг ноҳақ ишдан кетганини ижтимоий тармоқларга жойлаш орқали унга етказилган моддий зарарни қоплаш ва ишига қайта тиклаб беришини ваъда қилган. Ундан 1 000 доллар миқдоридаги пулларини олиб, ўзининг эҳтиёжларига ишлатган.
Изоҳ (0)