Экспортчиларни кутиш эмас, балки ўзимиз уларнинг ёнига бориб, гаплашиб, муаммо бўлса, ечим топишимиз керак — Республика Санитария-эпидемиология хизмати

Шавкат Мирзиёев раислигида ўтказилган стандартлаштириш соҳасида амалга оширилаётган ишлар самарадорлигини ошириш юзасидан йиғилиш танқидий руҳда ўтган. Бу ҳақда йиғилишдан сўнг Республика Санитария-эпидемиология хизмати бошлиғи Баҳодир Юсупалиев журналистларга берган интервьюсида айтиб ўтди, деб хабар бермоқда «Дарё» мухбири.

Унинг айтишича, бир қатор вазирлик ва идоралар экспортни кўпайтириш, жаҳон бозорларига чиқиш масалаларида жавобгар ҳамда рухсатномалар беради. Шу жумладан, бу ветеринария хизмати, санитария эпидемиология хизмати, техник жиҳатдан тартибга солиш агентлиги ҳамда ўсимликлар карантини агентлиги ҳам.

Мана шу 4 идора ўзаро ишларни мувофиқлаштириб, рухсатномалар бериш, экспортчиларни қўллаб-қувватлаш масаласи жуда чуқур муҳокама қилинди. Президентимиз томонидан берилган топшириқларни таҳлил қилиб, бир қанча хулосалар чиқардим. Биринчи навбатда биз барча имкониятларимизни экспортчиларни қўллаб-қувватлашга қаратишимиз зарур.

Уларни кутиш эмас, балки ўзимиз уларнинг ёнига бориб, гаплашиб, экспортда нима муаммо бўлса, уларнинг ечимини топиб беришимиз керак. Бу асосий ғоя. Буни амалга ошириш учун эса тизимли ишни ташкил қилишимиз, яъни ҳар бир вилоят, туманда айнан экспортга масъул ходимларни бириктириш орқали уларнинг биргаликдаги узвий иш олиб боришини таъминлаш.

Кейинги галда бизда мавжуд санитария нормаларини жаҳон талабларига мослаштиришимиз керак. Биз бу жараённи бошладик, бугунги кунда мана шундай 22 та қоида ҳамда меъёрлар ишлаб чиқилиб тасдиқланди. Йил охиригача яна 28 та қоида ва меъёрларни ишлаб чиқиб, тасдиқлашни режа қилиб олдик. Бундан ташқари озиқ-овқат хавфсизлиги тўғрисида қонунимиз бор, лекин у бугунги кунда талабга жавоб бермайди, уни қайта ишлаб Олий Мажлисга киритишимиз керак бўлади.

Шунингдек, озиқ-овқат хавфсизлиги тўғрисида регламент ҳам бор. Уни ҳам албатта қайта кўриб чиқиб, жаҳон талабларига мослаштиришимиз керак. Бу дегани Жаҳон савдо ташкилоти, Codeх Алиментариусга мослаштиришимиз керак. Кейинги галда мавжуд озиқ-овқат хавфсизлиги лабораторияларимизнинг салоҳиятини оширишимиз керак. Президентимиз берган топшириқлар асосида бу йил 4 та, 2023 йилда эса ана шундай лабораторияни халқаро аккредитациядан ўтказамиз. Бугун бундай лаборатория республикада 1 та ва у озиқ-овқат хавфсизлиги таҳлилини ўтказиш учун тан олинган.

Президентимиз эътибор қаратган яна бир масала, бу айнан шу соҳада кадрларни тайёрлаш ва салоҳиятини оширишдан иборат. Бугунги кунда биз Германия, Франция ва АҚШнинг айни йўналишдаги компаниялари билан ҳамкорлик қилган ҳолда ходимларимизнинг малакасини ошириб боряпмиз.

Яна бир муҳим масала, кадрларнинг салоҳиятини ўзимизда ошириш, яъни санитария эпидемиология соҳаси бўйича замонавий имкониятларга эга ўқув маркази ташкил этиш таклифи берилди.

Ушбу йиғилишда чиқарилган асосий фикр ҳам ана шу 4 ташкилотнинг биргаликда ишлаб, экспорт корхоналарини қўллаб-қувватлаш, бориб муаммоларини ўрганиш, GSP+ давлатларини инобатга олган ҳолда давлатнинг экспорт салоҳиятини кўтариш, экспорт ҳажмини кўтаришдан иборат.