Польшанинг собиқ Ташқи ишлар вазири, амалдаги Европарламент депутати Радослав Сикорский Украина хавфсизлик кафолатлари эвазига ядро қуролидан воз кечган Будапешт меморандумининг қоидаларини эслаб ўтди. Унинг фикрича, Москва ушбу ҳужжатда белгиланган мажбуриятларни бузган.
Сикорскийнинг айтишича, Россия Будапешт меморандуми қоидаларини бузган, шу боис Ғарб давлатлари Украинага ядро қуролини «совға қилиш» ҳуқуқига эга. Бу ҳақда у Espresso телеканали эфирида гапирган.
«Маълумки, 1994 йил, Будапешт меморандуми имзолангандан кейин Украина ўзининг ядровий салоҳиятидан воз кечди. Бугун руслар ва баъзилар бу ҳужжат Украина(мустақиллигининг)нинг кафолати бўлмаганини айтмоқда, лекин ўшанда ҳамма Украина ядро қуролидан воз кечиш эвазига СССР даврида ўрнатилган чегаралар доирасида мустақил давлат бўлишини тушунганди» — дея ўз сўзларини тушунтиради Сикорский.
Маълумот учун, Будапешт меморандуми 1994 йил 5 декабрда Украина, Россия, Буюк Британия ва АҚШ томонидан имзоланган. Ҳужжатда Украинага ўз ядро қуролидан воз кечиши эвазига бир қатор хавфсизлик кафолатлари берилган. Шартномага имзо қўйган давлатлар Украинанинг мустақиллиги, суверенитети ва чегараларини ҳурмат қилишга, унинг ҳудудий яхлитлигига таҳдид солмасликка ваъда берган, жумладан, Россия ҳам.
Шу йилнинг 19 февраль куни Украина президенти Владимир Зеленский маслаҳатлашувлар учун Будапешт меморандумига аъзо давлатлар саммитини чақириш истаги борлигини маълум қилганди. «Агар саммит йиғилмаса, Украина бу ҳужжатни бекор қилиши мумкин» — деганди у.
Изоҳ (0)