Gruziya prezidenti Salome Zurabishvili hukumat unga Fransiya, Polsha va Ukrainaga rasmiy tashriflarni taqiqlab qo‘yganini ma’lum qildi, deb yozadi “RBK”. U ushbu mamlakatlarga Gruziyaga Yevroittifoqqa kirish uchun nomzod maqomi berilishi jarayonida ko‘mak olish uchun borishni rejalashtirgandi.
Avvalroq Yevroparlament rezolyutsiya qabul qilib, Gruziya hukumatini OAVlar erkinligini qo‘llab-quvvatlashga va biznesmen Bidzina Ivanishviliga “Kreml bilan aloqalari hamda jurnalistlar va siyosiy raqiblarini ta’qib qilish imkonini beruvchi hukumatdagi aloqalari uchun” shaxsiy sanksiyalarni ko‘rib chiqishga chaqirgan edi. Tbilisi ushbu shartlarni bajarsa, Yevroparlament Yevroittifoq institutlarini Gruziyaga ittifoqqa kirish uchun nomzod maqomini taqdim etishni ko‘rib chiqishga va’da berdi.
Zurabishvili bunday rezolyutsiya qabul qilinishi yuzasidan afsus bildirdi.
“Men o‘zim ham, hukumat bizning nomzodimizni qo‘llab-quvvatlash uchun hamma narsani qilgani va ortiqcha faollikka hojat yo‘qligini aytishganidan keyin, bu ehtimol maqsadga muvofiq emas, deb o‘yladim, bu yerda men bir o‘zim butun hukumatni harakatsizlikdan qutqara oladigan vaziyatda emasman”, — dedi Gruziya prezidenti.
Newsgeorgia portali yozishicha, hukumat uning rasmiy tashrifiga ruxsat bermagan bo‘lsa-da, Zurabishvili xalqaro ayollar patsifistik anjumanida qatnashish uchun Yevrokengash prezidenti Sharl Mishelning taklifi bilan Bryusselga kelgan.
25-fevral kuni, Rossiya Ukrainada harbiy operatsiya boshlab, boshqa mamlakatlar unga qarshi sanksiyalar joriy qilishga kirishganidan keyin, Gruziya bosh vaziri Irakliy Garibashvili iqtisodiy va moliyaviy sanksiyalarga qo‘shilish respublika aholisiga zarar keltirishini aytdi, ammo Tbilisi Kiyevni qo‘llab-quvvatlashini ta’kidladi. Ayni vaqtda, Zurabishvili 1-aprel kuni mamlakat Ukrainani qo‘llab-quvvatlash uchun barcha xalqaro moliyaviy sanksiyalar va rezolyutsiyalarda ishtirok etayotganini ma’lum qildi.
Gruziya Yevroittifoqqa kirish uchun arizani Moldova bilan birgalikda mart oyi boshida Ukrainadan keyin topshirgan edi. May boshida Gruziya Yevroittifoqqa a’zolik uchun nomzod maqomini olish uchun anketa-so‘rovnomaning birinchi qismini topshirdi.
Izoh (0)