Samarqand shahridagi ko‘p qavatli binoning balkon qismidan 1,5 yoshli qizcha yiqilib tushib, vafot etgan. Bu haqda “Daryo” so‘roviga javoban Bosh prokuratura axborot xizmati ma’lum qildi.
Qayd etilishicha, 2022-yil 9-iyun kuni soat 18:00 larda Samarqand shahar “Qorasuv” maskani 81-uyda joylashgan, fuqaro A.K.ga tegishli bo‘lgan 28-xonadondan A.K.ning voyaga yetmagan farzandi, 19.11.2020-yilda tug‘ilgan SH.S. xonadon eshigining ochiqligi oqibatida, yo‘lakchadan tashqariga chiqib, ehtiyotsizlik oqibatida xonadon joylashgan 10-qavat balkon temir panjarasi orasidan pastga yiqilib tushib, og‘ir tan jarohatlari sababli voqea joyida vafot etgan.
Ushbu holat yuzasidan voqea joyiga Samarqand shahri bo‘yicha IIO FMB huzuridagi Tergov bo‘limi boshlig‘i podpolkovnik D.D.Sultonov, Samarqand shahar prokurori o‘rinbosari A.To‘ychiyev, shahar prokuraturasi tergovchisi F.Narzullayev boshchiligida tezkor-tergov guruhi tuzilib, hodisa sodir bo‘lgan joy va SH.S.ning murdasi mutaxassis ishtirokida ko‘zdan kechirilgan.
Marhuma SH.S.ning tanasidagi tan jarohatlari va o‘lim sabablarini aniqlash maqsadida sud-tibbiy ekspertiza tayinlash qarori chiqarilgan bo‘lib, ammo marhumaning oila a’zolari ushbu holat yuzasidan biror kimdan da’vo shikoyatlari yo‘qligi sababli ekspertiza tekshiruvi o‘tkazishni rad etilgan.
Ushbu holat xolislar ishtirokida hujjatlashtirilib, marhuma SH.S.ning murdasi oila a’zolari ixtiyoriga qoldirilgan.
Mazkur holat yuzasidan tergovga qadar tekshiruv harakatlari olib borilmoqda.
Bundan avval Toshkentdagi ko‘p qavatli uyning 11-qavatidan 1,5 yashar bola tushib ketgani haqida xabar qilingandi.
Izoh (0)