Konstitutsiyaga o‘zgarishlar kiritish bo‘yicha berilayotgan takliflarda O‘zbekistonda insofsiz raqobat va monopoliyaga yo‘l qo‘yilmasligi belgilanishini so‘rashmoqda. Bu haqda “Milliy tiklanish” partiyasi yetakchisi, Konstitutsiyaviy komissiya raisi o‘rinbosari Alisher Qodirov Namanganda o‘tkazilgan konstitutsiyaviy islohotlarga bag‘ishlangan muloqotda ma’lum qildi, deya xabar beradi “Daryo” muxbiri Azizbek Abduvaliyev.

“Oldinlari buning imkoni yo‘q edi, endi esa amalga oshirish mavridi keldi. Ko‘pchilik meni monopol tashkilotlar, xususan, UzAuto Motors’ni qo‘llab-quvvatlaydi, deb o‘ylaydi. Energetika sohasida endi bozor mexanizmlari shakllanyapti va bu to‘g‘ri deb hisoblayman. Investorlar davlat bilan sherikchilik qilmaydi, chunki davlat biznes-struktura emas, uning boshqa vazifalari bor. Keladi, ko‘radi — energiya bozori to‘liq davlat tasarrufida. Pul tikmaydi va qaytib ketadi. O‘tgan yillar mobaynida mashinalar xarid qilgan odamlardan monopoliya hisobiga orttirilgan daromad aholiga energetika sohasida berilgan subsidiyalarni qoplashga sarflandi, desak bu ham qaysidir ma’noda to‘g‘ri bo‘ladi”, — dedi Alisher Qodirov.

Qodirovning aytishicha, Konstitutsiyaviy komissiyaga hozirgacha 15 mingdan ortiq taklif kelib tushgan. Komissiya esa har juma kuni yig‘ilishlarida bu takliflarni ko‘rib chiqmoqda.

“Ko‘rib chiqilayotgan takliflarning asosiy negizi shundaki, fuqaro va davlat o‘rtasidagi har qanday nizoli yoki mavhum holat inson foydasiga hal bo‘lsin. Mulkdorning mulkiga sud qarorisiz daxl etish mumkin emas. Oila masalalariga ko‘p e’tibor qaratilyapti. Jumladan, nikoh ‘tomonlarning’ emas, aynan erkak va ayolning ixtiyoriy roziligi va teng huquqliligiga asoslanishi. Otalik instituti, otalarning majburiyati va mas’uliyati kuchaytirilishi zarur, aksar holatlarda ayollar ajrimdan so‘ng bolalari va muammolari qurshovida qolib ketyapti. Har bir inson ish o‘rni va adolatli maoshga ega bo‘lishi kerak. Shuningdek, ish vaqti ham aniq-tiniq belgilanib qo‘yishi kerak. Chunki shanba-yakshanba va kechki payt ham ishlayverish oqibatida oilalarda parokandalik yuzaga kelyapti, farzandlar tarbiyasi aro yo‘lda qolib ketyapti. Bu, xususan, davlat xizmatchilariga tegishli”, — dedi “Milliy tiklanish” partiyasi rahbari.

Alisher Qodirovga ko‘ra, konstitutsiyada tibbiy yordamning kafolatlangan darajasi va maktabgacha ta’lim tashkilotlari davlat nazoratiga olinishi aniq ko‘rsatilishi kerak.

“Hozir bog‘chalarda 75 nafar bolaga bir tarbiyachi to‘g‘ri kelyapti. Ijtimoiy tarmoqlarda ko‘rib qolyapmiz, bolalarga nisbatan sovuqqon, qo‘pol munosabatda bo‘linayotgani, ayrim holatlarda hatto jazo qo‘llanayotganini. Bunday muomalani ko‘rgan bola ertaga o‘zi ham beshafqat va zo‘ravon bo‘lib ulg‘ayadi. Shu sababli bu sohada ham qat’iy davlat nazorati o‘rnatilishi kerak”, — deydi Alisher Qodirov.

Muloqot davomida ishtirokchilar tomonidan konstitutsiyada mahalla maqomini belgilash, qishloq fuqarolar yig‘inlarini tiklash, korrupsiyaga qarshi moddalarni kiritish, OAV jamiyatda tutgan mavqeyini kuchaytirish, davlat bayrog‘i o‘rnatilishi tartibini soddalashtirish kabi ko‘plab taklif va mulohazalar bildirildi. Alisher Qodirov ularning aksari jo‘yali ekanligini ta’kidlab, takliflarni Konstitutsiyaviy komissiyaga yuborish va bu muhim siyosiy jarayonda faol ishtirok etishga chaqirdi.

Mavzuga doir:

Konstitutsiyaning nikohga oid bandiga o‘zgartirish kiritish taklifi bildirildi

Konstitutsiyaning dam olish huquqiga oid moddasiga o‘zgartirish kiritish taklif etildi