Бразилия президенти Жаир Болсонару супермаркетлар раҳбарларини асосий озиқ-овқат маҳсулотларининг нархини пасайтиришга чақирди. Бу ҳақда у Бразилия Супермаркетлар ассоциацияси форумида сўзлаган нутқида маълум қилди, деб хабар бермоқда Valor Econômico газетаси.
«Мен озиқ-овқат саватини ишлаб чиқариш занжирига алоқадор барчани аҳолининг муҳим қисмига, айниқса унинг энг камтарона ҳаёт кечирадиган вакилларига ёрдам беришимиз учун имкон қадар кам даромад билан ишлашга чақираман», — деди Болсонару.
Унинг таъкидлашича, «қийин пайтларда Бразилиянинг барча фуқаролари биргаликда ҳаракат қилишлари зарур».
Folha de S.Paulo нашрининг Бразилия инфляция индекси (IPCА) маълумотларига таянган ҳолда хабар беришича, сўнгги 12 ой давомида инфляция кўрсаткичи 11,73 фоизни ташкил этган, озиқ-овқат нархлари ҳамон ўсиб бормоқда. Масалан, апрель ойида инфляция 2,06 фоизни, май ойида 0,48 фоизни ташкил қилди.
Бразилия иқтисодиёт вазири Пауло Гедес мамлакат ҳукумати Украинадаги урушнинг иқтисодий таъсирини минималлаштириш учун қўлидан келган барча ишни қилганини айтиб, жумладан, 200 миллион бразилиялик учун солиқларни камайтиришга эришилганини таъкидлаган.
Изоҳ (0)