May oyida AQSH inflyatsiyasi 40 yillik eng yuqori darajaga ko‘tarildi. Bu narx bosimining iqtisodiyotda mustahkamlanib borayotganidan dalolat beradi, deya xabar bermoqda Bloomberg.
Yuqori inflyatsiya Federal rezerv tizimini foiz stavkalarini keskin oshirishga undashi mumkin. Buning ortidan Oq uy va AQSH prezidenti Jo Bayden siyosiy bosim ostida qoladi.
AQSH Mehnat departamenti ma’lumotlariga ko‘ra, iste’mol narxlari indeksi o‘tgan yilga nisbatan 8,6 foizga oshgan. Narxlar eng ko‘p uy-joy, oziq-ovqat va gaz sohasida ko‘tarilgan.
Raqamlar inflyatsiya eng yuqori cho‘qqiga chiqqanini va haliveri pasaymasligini ko‘rsatmoqda. Rekord darajadagi benzin narxlari, oziq-ovqat va boshpana xarajatlari bilan birlashganda, amerikaliklarning yashash sharoiti og‘irlashmoqda.
40 yillik eng yuqori inflyatsiyadan keyin Federal rezerv tizimi kelayotgan haftada stavkalarni oshirishi mumkin.
May oyida ham aholi uchun zaruriy mahsulotlar narxi keskin o‘sishda davom etdi. Misol uchun, energiya narxlari o‘tgan yilga qaraganda 34,6 foizga, benzin narxlari 49 foizga oshdi. Bu 2005-yildan beri eng yuqori ko‘rsatkichdir.
Uy-joy ijarasi 1987-yildan beri eng yuqori darajaga ko‘tarildi va 5,2 foizga oshdi. Elektr energiya narxlari ham 12 foizga qimmatlashgan.
Bu sohalarda narxlar yanada o‘sishda davom etishi mumkin. Ukrainada davom etayotgan urush va Rossiyaga nisbatan qo‘llanilayotgan sanksiyalar ozi-ovqat va energiya narxining ko‘tarlishiga olib keladi.
Yil oxirida bo‘lib o‘tadigan oraliq saylovlar oldidan reytingi pasayib ketayotgan mamlakat prezidenti Jo Bayden bir qator muammolar qurshovida qolgan.
Rekord darajadagi inflyatsiya Amerika aholisi o‘rtasida Baydenga nisbatan ishonchsizlikni kuchaytirdi.
Ma’lumotlarga ko‘ra, inflyatsiyaga moslashtirilgan o‘rtacha soatlik ish haqi may oyida o‘tgan yilga nisbatan 3 foizga kamaydi. Bu 2021-yil aprel oyidan beri eng katta pasayish. Bundan tashqari, inflyatsiya kutilmalari ham ortib bormoqda.
Izoh (0)