Май ойида АҚШ инфляцияси 40 йиллик энг юқори даражага кўтарилди. Бу нарх босимининг иқтисодиётда мустаҳкамланиб бораётганидан далолат беради, дея хабар бермоқда Bloomberg.
Юқори инфляция Федерал резерв тизимини фоиз ставкаларини кескин оширишга ундаши мумкин. Бунинг ортидан Оқ уй ва АҚШ президенти Жо Байден сиёсий босим остида қолади.
АҚШ Меҳнат департаменти маълумотларига кўра, истеъмол нархлари индекси ўтган йилга нисбатан 8,6 фоизга ошган. Нархлар энг кўп уй-жой, озиқ-овқат ва газ соҳасида кўтарилган.
Рақамлар инфляция энг юқори чўққига чиққанини ва ҳаливери пасаймаслигини кўрсатмоқда. Рекорд даражадаги бензин нархлари, озиқ-овқат ва бошпана харажатлари билан бирлашганда, америкаликларнинг яшаш шароити оғирлашмоқда.
40 йиллик энг юқори инфляциядан кейин Федерал резерв тизими келаётган ҳафтада ставкаларни ошириши мумкин.
Май ойида ҳам аҳоли учун зарурий маҳсулотлар нархи кескин ўсишда давом этди. Мисол учун, энергия нархлари ўтган йилга қараганда 34,6 фоизга, бензин нархлари 49 фоизга ошди. Бу 2005 йилдан бери энг юқори кўрсаткичдир.
Уй-жой ижараси 1987 йилдан бери энг юқори даражага кўтарилди ва 5,2 фоизга ошди. Электр энергия нархлари ҳам 12 фоизга қимматлашган.
Бу соҳаларда нархлар янада ўсишда давом этиши мумкин. Украинада давом этаётган уруш ва Россияга нисбатан қўлланилаётган санкциялар ози-овқат ва энергия нархининг кўтарлишига олиб келади.
Йил охирида бўлиб ўтадиган оралиқ сайловлар олдидан рейтинги пасайиб кетаётган мамлакат президенти Жо Байден бир қатор муаммолар қуршовида қолган.
Рекорд даражадаги инфляция Америка аҳолиси ўртасида Байденга нисбатан ишончсизликни кучайтирди.
Маълумотларга кўра, инфляцияга мослаштирилган ўртача соатлик иш ҳақи май ойида ўтган йилга нисбатан 3 фоизга камайди. Бу 2021 йил апрель ойидан бери энг катта пасайиш. Бундан ташқари, инфляция кутилмалари ҳам ортиб бормоқда.
Изоҳ (0)