“Barselona” va yarim himoyachi Gavi yangi shartnoma borasida kelisha olmayapti.
Kataloniya sayti Beteve’ning ma’lum qilishicha, “ko‘k-anorranglilar” 17 yoshli xavbek uchun yiliga 2 million yevro maosh bermoqchi. Ammo bu futbolchi va uning agenti Ivan de la Penya talab qilayotgan maoshdan ancha kam.
Gavi “Barselona”dan yildan-yilga maoshi oshib boradigan 4 yillik shartnoma kutmoqda: birinchi yili 4 million yevro, ikkinchi yil 5, uchinchi yil 6 million yevro. To‘rtinchi yilgi maosh esa ushbu davr ichida futbolchi o‘zini qay darajada ko‘rsata olganiga qarab belgilanadi.
Yarim himoyachiga APLdan kamida 2 ta taklif bor va ulardan biri “Liverpul”ga tegishli. Mersisaydliklar yiliga 9 million yevro maosh to‘lashga tayyor. Biroq Gavining o‘zi va uning atrofidagilar “Barselona” bilan muzokara olib borishni va shartnomani uzaytirishni ma’qul ko‘rmoqda.
Ispaniyalik futbolchi 2021/22-yilgi mavsum “Barselona” safida La Ligada 34 ta o‘yinda ishtirok etib, 2 ta gol va 6 ta golli uzatmaga mualliflik qildi.
Avvalroq “Barselona” rahbariyati jamoada maoshlar chegarisini o‘rnatmoqchi ekani va u 10 million yevro etib belgilanishi xabar qilingandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)