«Барселона» ва ярим ҳимоячи Гави янги шартнома борасида келиша олмаяпти.
Каталония сайти Beteve’нинг маълум қилишича, «кўк-анорранглилар» 17 ёшли хавбек учун йилига 2 миллион евро маош бермоқчи. Аммо бу футболчи ва унинг агенти Иван де ла Пеня талаб қилаётган маошдан анча кам.
Гави «Барселона»дан йилдан йилга маоши ошиб борадиган 4 йиллик шартнома кутмоқда: биринчи йили 4 миллион евро, иккинчи йил 5, учинчи йил 6 миллион евро. Тўртинчи йилги маош эса ушбу давр ичида футболчи ўзини қай даражада кўрсата олганига қараб белгиланади.
Ярим ҳимоячига АПЛдан камида 2 та таклиф бор ва улардан бири «Ливерпуль»га тегишли. Мерсисайдликлар йилига 9 миллион евро маош тўлашга тайёр. Бироқ Гавининг ўзи ва унинг атрофидагилар «Барселона» билан музокара олиб боришни ва шартномани узайтиришни маъқул кўрмоқда.
Испаниялик футболчи 2021/22 йилги мавсум «Барселона» сафида Ла Лигада 34 та ўйинда иштирок этиб, 2 та гол ва 6 та голли узатмага муаллифлик қилди.
Аввалроқ «Барселона» раҳбарияти жамоада маошлар чегарисини ўрнатмоқчи экани ва у 10 миллион евро этиб белгиланиши хабар қилинганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)