Toshkent shahrining Yakkasaroy tumanida Xitoy fuqarosining uyidan 265 ming dollarni o‘g‘irlagan olti nafar shaxs qo‘lga olindi, deb xabar beradi Tergov departamenti.
Ma’lum qilinishicha, 31-may kuni soat 08:30 larda noma’lum shaxslar Qushbegi dahasida yashovchi 36 yoshli Xitoy fuqarosi T.V.ning uyiga g‘ayriqonuniy ravishda kirish eshigi qulfini buzgan holda kirgan. Ular xonadon yotoqxonasidagi shkafga o‘rnatilgan va ichida 265 ming dollar bo‘lgan temir seyfini yashirin ravishda egallab, hodisa bo‘lgan joyidan yashiringan.
Mazkur holat yuzasidan Yakkasaroy tumani bo‘yicha IIO FMB huzuridagi Tergov bo‘limi tomonidan noma’lum shaxsga nisbatan Jinoyat kodeksning 169-moddasi 4-qismi “a” bandi (o‘g‘irlik) bilan jinoyat ishi qo‘zg‘atilgan.
Olib borilgan tergov-tezkor harakatlari natijasida mazkur jinoyatni Surxondaryo viloyatida yashovchi 24 yoshli J.M., R.l., 19 yoshli N.J., B.M., 20 yoshli O.O. va 23 yoshli T.A. sodir etgani aniqlangan. Ulardan jami 246 ming dollar, 9,7 million so‘m, 100 yevro hamda mazkur pullarga sotib olingan bir dona iPhone 13 telefon apparati ashyoviy dalil tariqasida rasmiylashtirib olingan.
Hozirda yuqoridagi shaxslarning har biriga Jinoyat kodeksining 169-moddasi 4-qismi “a” bandi bilan ayb e’lon qilinib, ehtiyot chorasi sifatida “qamoqqa olish” qo‘llanilgan. Tergov harakatlari davom etmoqda.
Eslatib o‘tamiz, yanvar oxirlarida Toshkentda ikki ayol xitoylik erkakning 61,5 million so‘mini talon-toroj qilgandi.
Izoh (0)