Тошкент шаҳрининг Яккасарой туманида Хитой фуқаросининг уйидан 265 минг долларни ўғирлаган олти нафар шахс қўлга олинди, деб хабар беради Тергов департаменти.
Маълум қилинишича, 31 май куни соат 08:30 ларда номаълум шахслар Қушбеги даҳасида яшовчи 36 ёшли Хитой фуқароси Т.V.нинг уйига ғайриқонуний равишда кириш эшиги қулфини бузган ҳолда кирган. Улар хонадон ётоқхонасидаги шкафга ўрнатилган ва ичида 265 минг доллар бўлган темир сейфини яширин равишда эгаллаб, ҳодиса бўлган жойидан яширинган.
Мазкур ҳолат юзасидан Яккасарой тумани бўйича ИИО ФМБ ҳузуридаги Тергов бўлими томонидан номаълум шахсга нисбатан Жиноят кодекснинг 169-моддаси 4-қисми «а» банди (ўғирлик) билан жиноят иши қўзғатилган.
Олиб борилган тергов-тезкор ҳаракатлари натижасида мазкур жиноятни Сурхондарё вилоятида яшовчи 24 ёшли Ж.М., Р.л., 19 ёшли Н.Ж., Б.М., 20 ёшли О.О. ва 23 ёшли Т.А. содир этгани аниқланган. Улардан жами 246 минг доллар, 9,7 миллион сўм, 100 евро ҳамда мазкур пулларга сотиб олинган бир дона iPhone 13 телефон аппарати ашёвий далил тариқасида расмийлаштириб олинган.
Ҳозирда юқоридаги шахсларнинг ҳар бирига Жиноят кодексининг 169-моддаси 4-қисми «а» банди билан айб эълон қилиниб, эҳтиёт чораси сифатида «қамоққа олиш» қўлланилган. Тергов ҳаракатлари давом этмоқда.
Эслатиб ўтамиз, январь охирларида Тошкентда икки аёл хитойлик эркакнинг 61,5 миллион сўмини талон-торож қилганди.
Изоҳ (0)