Rossiya va Eron prezidentlari Vladimir Putin hamda Ibrohim Raisiy telefon orqali muloqot qildi. Tomonlar Eronning yadroviy kelishuvi bo‘yicha “yakuniy qarorga”ga kelishida erishilgan yutuqlarni muhokama qildi.
“Eron yadro dasturi atrofidagi vaziyatni ko‘rib chiqishda Qo‘shma harakatlar rejasi va BMT Xavfsizlik Kengashning 2015-yil 20-iyulda tasdiqlagan 2231-rezolyutsiyasi talablari saqlanishi va to‘liq bajarilishini ta’minlaydigan yakuniy kelishuvga erishish uchun diplomatik sa’y-harakatlarni davom ettirish zarurligi qayd etildi” — deyiladi Kreml bayonotida.
Shuningdek, Kreml muloqot chog‘ida prezidentlar “Rossiya-Eron munosabatlarining bugungi kundagi darajasiga yuqori baho berishdi” deb yozadi. Tomonlar ikki tomonlama munosabatlarni, jumladan, savdo-iqtisodiy loyihalarni amalga oshirishni mustahkamlashga bel bog‘lagan.
Bundan tashqari, Kremlning ta’kidlashicha, muzokaralarda “Suriyadagi vaziyatni tartibga solishga ko‘maklashish bo‘yicha Ostona kelishuvlari doirasida kelgusida birgalikda ishlashga sodiqlik yana bir bor tasdiqlandi”.
Vladimir Putin, shuningdek, temiryo‘l halokati munosabati bilan Eron prezidentiga hamdardlik bildirdi.
Izoh (0)