Маймунчечак билан қайта касалланиш мумкин, бундай ҳолатлар қайд этилган. Бу ҳақда Жаҳон соғлиқни сақлаш ташкилоти (ЖССТ)нинг фавқулодда вазиятлар дастури чечакка қарши курашиш котибияти раҳбари Розамунд Льюис брифингда маълум қилди, деб ёзади «РБК».
«Маймунчечакка нисбатан умрбод иммунитетга келсак, у табиий чечакка ўхшаб пайдо бўлиши мумкин. Бироқ биз Ғарбий Африкада аввал маймунчечак билан алоқада бўлган шифокор кейинроқ яна касалланганини кўрдик», — деди доктор.
ЖССТ раҳбари Тедрос Гебрейесус маймунчечакка қарши умумий вакцинацияни амалга ошириш тавсия этилмаслигини таъкидлади, чунки бундай вакциналар мавжуд бўлган саноқли жойларда улар касалланиш хавфи анча юқори бўлган одамларни ҳимоя қилиш учун қўлланилмоқда.
Гебрейесус маймунчечак тарқалиши одатий ҳол бўлган мамлакатлардан ташқарида касалланганлар сони 1 минг кишидан ошганини маълум қилди. Бундай ҳолатлар ҳақидаги маълумотлар 29 та давлатдан келиб тушган.
Айни вақтда, Россия соғлиқни сақлаш вазири Михаил Мурашко Россияда чечакнинг олдини олиш учун янги вакцина ҳамда уни даволаш учун дорилар синовдан ўтказилаётганини маълум қилди. Синовларнинг оралиқ натижалари қандай бўлгани ва янги дорилар қачон сотувга чиқарилишига аниқлик киритилмади.
Май ойида «Вектор» илмий маркази вакиллари табиий чечакка қарши вакцина маймунчечакка қарши ҳам самарали эканини маълум қилганди.
Изоҳ (0)