Zaporojye viloyatida Rossiyaga qo‘shilish bo‘yicha referendum yil oxirigacha o‘tkaziladi, tegishli qaror allaqachon qabul qilingan. Bu haqda Rossiya istilosidan keyin hududda tuzilgan “harbiy-fuqarolik boshqaruvi” a’zosi Vladimir Rogov “RIA Novosti”ga ma’lum qildi.
“Zaporojye viloyatida Rossiya tarkibiga qo‘shilish bo‘yicha referendum o‘tkazishga tayyorgarlik ko‘rishni boshlash to‘g‘risida umumiy qaror qabul qilindi. Referendum shu yil bo‘lib o‘tadi. Tayyorgarlik bir necha oy davom etadi”, — deydi faol.
Uning qo‘shimcha qilishicha, bo‘lajak referendumga oid masalalarning matni tez orada taqdim etiladi.
7-iyun kuni Rossiya prezidenti ma’muriyati rahbari o‘rinbosari Sergey Kiriyenko Zaporojye viloyatiga tashrif buyurdi — u viloyatning Melitopol shahriga keldi. Shundan so‘ng Rossiya davlat matbuoti tomonidan “Melitopol harbiy-fuqarolik ma’muriyati rahbari” sifatida ta’riflangan Galina Danilchenko “referendumga tayyorgarlik” boshlanganini e’lon qildi. U gap qanday referendum haqida ketayotgani va uning qachon o‘tkazilishiga aniqlik kiritmagan edi.
Kiriyenko Ukrainaning bosib olingan hududlariga tashrif buyurgan eng yuqori martabali rossiyalik amaldorga aylandi. 7-iyun kuni u Xersonga ham keldi. Rossiya bosqinidan keyin tuzilgan “Xerson viloyati harbiy-fuqarolik boshqaruvi” vakillari ham hududning tez orada Rossiya tarkibiga kirishiga ishonch bildirgan edi.
Rossiya qonunchiligiga ko‘ra, xorijiy davlat yoki uning bir qismi ushbu davlat rahbariyatining roziligisiz Rossiyaga qo‘shilishi mumkin emas. Shuning uchun 2014-yilda Qrim dastlab mustaqillik deklaratsiyasini qabul qilgan, keyin esa Rossiyaga qo‘shilish bo‘yicha referendum o‘tkazgan.
Izoh (0)