Belarus Rossiya va Yevroittifoq mamlakatlari o‘rtasidagi aloqalarning buzilishidan foyda ko‘rgan asosiy mamlakatlardan biriga aylandi, deb yozadi Meduza. Aprelda mamlakatga Belarus eksporti 100 foizdan ko‘proq oshib qariyb 1,5 milliard dollarni tashkil etdi. Bu haqda Bloomberg xalqaro savdo-sotiq haqidagi ma’lumotlar bo‘yicha o‘z tahliliga asoslanib xabar berdi.
Taqqoslash uchun, Germaniyaning Rossiyaga eksporti aprelda taxminan 800 million dollargacha qisqardi. Shu tariqa, Belarus Rossiyaga tovarlar yetkazib berish bo‘yicha birinchi marta Germaniyani ortda qoldirdi (uning iqtisodiyoti Belarusnikidan 60 marta kattaroq).
Rossiyaga xorijiy importning barchasi aprel holatiga 2021-yil apreli va 2022-yil fevraliga nisbatan taxminan 60-80 foizga pasaydi, deb yozadi Bloomberg “Otkritiye” banki ma’lumotlariga tayanib. Ushbu ma’lumotlarga ko‘ra, import hajmi ushbu davrda 27 milliard dollardan 5-10 milliard dollargacha tushib ketgan bo‘lishi mumkin.
Bloomberg hisob-kitoblariga ko‘ra, Rossiyaga 2021-yilda importning deyarli yarmi ulushiga to‘g‘ri kelgan mamlakatlardan yetkazib berishlar aprel oyida o‘tgan yilning shu davriga nisbatan taxminan 40 foizga pasaygan. Bu Rossiyaga qarshi sanksiyalar kiritmagan Xitoydan tovar yetkazib berishga ham taalluqli.
“Bozor deyarli quladi [shu bahorda]. Bugungi kunda Yevropadan yuk keltirish juda qiyin, ba’zida esa deyarli imkonsiz”, — deya agentlikka ma’lum qildi SDEK yetkazib berish xizmati xalqaro logistika bo‘limi boshlig‘i Andrey Pobejimov.
“Rossiya import va eksport bo‘yicha batafsil ma’lumotlar kabi ba’zi asosiy statistik ko‘rsatkichlarni e’lon qilishni to‘xtatib qo‘ygan, shu sababli uning iqtisodiyoti haqida aniq ma’lumotlarni olish qiyinlashgan”, — deyiladi xabarda.
Izoh (0)