Jahon banki (JB) bu yilgi global iqtisodiy o‘sish prognozini yana qayta ko‘rib chiqdi va uni 4,1 foizdan 2,9 foizga tushirdi. Bu haqda “Kommersant” xabar berdi.
Jahon banki ekspertlari Ukrainadagi mojaroning salbiy oqibatlarini, shuningdek, dunyoda inflyatsiyaning davom etishi xavfini qayd etmoqda. Joriy yilning o‘rtalarida narxlarning eng yuqori darajaga chiqishi kutilmoqda.
Bunday sharoitda jahon iqtisodiyoti stagflyatsiya xavfiga duch kelishi mumkin, chunki 1970-yillarda neft narxlarining ko‘tarilishi va inflyatsiyaning tezlashishi markaziy bank siyosatini keskin kuchaytirishni talab qilgan, bu esa o‘z navbatida iqtisodiy o‘sish sur’atlarining sezilarli sekinlashuviga olib kelgan.
Stagflyatsiya — sekin iqtisodiy o‘sish va nisbatan yuqori ishsizlik yoki iqtisodiy turg‘unlik bilan tavsiflanuvchi holat. Bu esa bir vaqtning o‘zida inflyatsiya bilan birga keladi. Stagflyatsiyani muqobil ravishda yalpi ichki mahsulotning pasayishi bilan aniqlash mumkin.
2023—2024-yillarda jahon yalpi ichki mahsulotining taxminan bir xil sekin o‘sishi prognoz qilinmoqda — 3 foiz. Xususan, AQSHda iqtisodiy o‘sish 2,5 foiz, yevrohududda 2,5 foiz, Xitoyda 4,3 foiz, O‘zbekistonda esa 5,3 foiz o‘sish bo‘lishi kutilmoqda.
Rossiya uchun Jahon banki ma’lum sabablarga ko‘ra o‘sishni emas, balki iqtisodiyotning pasayishini 8,9 foizga taxmin qilmoqda.
Ukrainadagi urush qisqa muddatda ishbilarmonlik faolligiga, sarmoya va savdoga putur yetkazmoqda, shu bilan birga, talab pasayib, moliyaviy va pul-kredit rag‘batlari barham topmoqda, — deb ta’riflaydi Jahon banki hozirgi dunyodagi vaziyatni.Global o‘sish sur’atlarining sekinlashuvidan tashqari, bank stagflyatsiya, ya’ni past o‘sish sur’atlarida yuqori inflyatsiya xavfini ham qayd etadi.
Inflyatsiya darajasi 2020-yilning o‘rtalarida qayd etilgan eng past darajadan keskin o‘sdi, global o‘sish esa, aksincha, teskari yo‘nalishda harakat qilmoqda va o‘n yillik oxirigacha 2010-yillardagidan past bo‘ladi, — deydi Jahon banki.Avvalroq Jahon banki O‘zbekiston yalpi ichki mahsuloti 2022-yilda 4,3 foizga o‘sishini prognoz qilgandi.
Izoh (0)