31-mayda Yevropa Ittifoqi yetakchilari Rossiya neftiga qisman taqiq qo‘yishga kelishib oldi va bu oltinchi sanksiyalar paketiga yo‘l ochib berdi. The Economist nashri sanksiyalar o‘zini oqlamayotgani haqida ma’lum qildi.
Fevral oyida Rossiya Ukrainaga bostirib kirganidan beri uning Yevropaga yetkazib beriladigan neft miqdori ortib bormoqda. Yanvar—aprel oylarida u 14 foizga ya’ni kuniga 750 ming barreldan 857 ming barrelgacha o‘sgan.
Embargo faqat dengizda tashiladigan xomashyo va neft mahsulotlariga taalluqlidir, u hozircha Rossiyadan importning atigi 75 foizini qoplaydi.
Markaziy va Sharqiy Yevropadagi bir nechta mamlakatlarga quvur orqali yetkazib beriladigan neft vaqtinchalik embargodan ozod qilingan — bu kelishuvga to‘sqinlik qilgan Vengriyaga berilgan imtiyoz.
Bu mamlakatlardagi neftni qayta ishlash korxonalari g‘arblik xaridorlarning ko‘pchiligi rad etayotgan arzon Rossiya xomashyosini sotib olmoqda.
"Drujba" quvuri Chexiya, Germaniya, Vengriya, Polsha va Slovakiyadagi neftni qayta ishlash zavodlariga neft yetkazib beradi. Ikki eng yirik xaridorlar Germaniya va Polsha yil oxirigacha Rossiyadan neft sotib olmaslikka kelishib olgan.
Keyinchalik embargo Rossiya neftining qariyb 90 foizini qisqartiradi. Qolgan davlatlar qachon ta’minotdan uzilishi noma’lum.
Boshqa xaridorlar — dengizga chiqish imkoni bo‘lmagan barcha mamlakatlar, xomashyoning boshqa manbalariga o‘tish qimmat va qiyinligini ta’kidlaydi.
Quvur orqali yetkazib beriladigan neftdan asosiy foyda oluvchi Germaniya Ukrainada urush boshlanganidan beri neft importini kamaytirgan yagona davlatdir. Yanvar oyida u “Drujba” orqali neftning yarmini oldi. Bu ko‘rsatkich aprelda uchdan birga qisqartirilgan.
Chexiya va Slovakiya “Drujba” orqali importni to‘liq tugatishni qo‘llab-quvvatlamoqda, biroq bu uchun ikki-uch yillik moslashuv davri talab etiladi.
Vengriya neft va gaz kompaniyasi Xorvatiyadan keladigan quvurga tayanib, Rossiya nefti o‘rnini to‘ldirish mumkinligini aytgan edi. Biroq zarur infratuzilmani qurish uchun to‘rt yil kerak bo‘ladi.
Yevropa Ittifoqi yetakchilari “Drujba” imtiyozi qayta ko‘rib chiqilishini ta’kidlamoqda.
Avvalroq Yevropa yetakchilari Rossiyadan neft importini qisman taqiqlash haqida kelishib olgani, lekin neft quvurlari orqali yetkazib berish embargo ostida qolmasligi xabar berilgan edi.
Izoh (0)