31 майда Европа Иттифоқи етакчилари Россия нефтига қисман тақиқ қўйишга келишиб олди ва бу олтинчи санкциялар пакетига йўл очиб берди. The Economist нашри санкциялар ўзини оқламаётгани ҳақида маълум қилди.
Февраль ойида Россия Украинага бостириб кирганидан бери унинг Европага етказиб бериладиган нефть миқдори ортиб бормоқда. Январь—апрель ойларида у 14 фоизга яъни кунига 750 минг баррелдан 857 минг баррелгача ўсган.
Эмбарго фақат денгизда ташиладиган хом ашё ва нефть маҳсулотларига тааллуқлидир, у ҳозирча Россиядан импортнинг атиги 75 фоизини қоплайди.
Марказий ва Шарқий Европадаги бир нечта мамлакатларга қувур орқали етказиб бериладиган нефть вақтинчалик эмбаргодан озод қилинган — бу келишувга тўсқинлик қилган Венгрияга берилган имтиёз.
Бу мамлакатлардаги нефтни қайта ишлаш корхоналари ғарблик харидорларнинг кўпчилиги рад этаётган арзон Россия хом ашёсини сотиб олмоқда.
"Дружба" қувури Чехия, Германия, Венгрия, Польша ва Словакиядаги нефтни қайта ишлаш заводларига нефть етказиб беради. Икки энг йирик харидорлар Германия ва Польша йил охиригача Россиядан нефть сотиб олмасликка келишиб олган.
Кейинчалик эмбарго Россия нефтининг қарийб 90 фоизини қисқартиради. Қолган давлатлар қачон таъминотдан узилиши номаълум.
Бошқа харидорлар — денгизга чиқиш имкони бўлмаган барча мамлакатлар, хом ашёнинг бошқа манбаларига ўтиш қиммат ва қийинлигини таъкидлайди.
Қувур орқали етказиб бериладиган нефтдан асосий фойда олувчи Германия Украинада уруш бошланганидан бери нефть импортини камайтирган ягона давлатдир. Январь ойида у «Дружба» орқали нефтнинг ярмини олди. Бу кўрсаткич апрелда учдан бирга қисқартирилган.
Чехия ва Словакия «Дружба» орқали импортни тўлиқ тугатишни қўллаб-қувватламоқда, бироқ бу учун икки-уч йиллик мослашув даври талаб этилади.
Венгрия нефть ва газ компанияси Хорватиядан келадиган қувурга таяниб, Россия нефти ўрнини тўлдириш мумкинлигини айтган эди. Бироқ зарур инфратузилмани қуриш учун тўрт йил керак бўлади.
Европа Иттифоқи етакчилари «Дружба» имтиёзи қайта кўриб чиқилишини таъкидламоқда.
Аввалроқ Европа етакчилари Россиядан нефть импортини қисман тақиқлаш ҳақида келишиб олгани, лекин нефть қувурлари орқали етказиб бериш эмбарго остида қолмаслиги хабар берилган эди.
Изоҳ (0)