Samarqand viloyatining Qo‘shrabot tumanida katta tezlikda harakatlanib, boshqaruvni yo‘qotgan Damas ag‘darilib ketdi, deb xabar beradi viloyat IIB axborot xizmati.
Ma’lum qilinishicha, 1-iyun kuni soat 07:30 larda tumanning “Qo‘rg‘on” MFY hududidan o‘tuvchi 4R-55 avtomobil yo‘lining 15-kilometrida Damas rusumli transport vositasi katta tezlikda harakatlanib kelib, boshqaruvni yo‘qotib, yo‘lning o‘ng tarafiga ag‘darilib ketgan.
Oqibatda transport vositasida bo‘lgan haydovchi va ikki nafar yo‘lovchi tan jarohatlari olib, tuman tibbiyot birlashmasiga murojaat qilgan.
Holat yuzasidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 1-qismi bilan jinoyat ishi qo‘zg‘atilib tergov harakatlari olib borilmoqda.
Avvalroq Jizzaxda katta tezlikda harakatlangan Lacetti avtomobili Nexia-3 va Damas bilan to‘qnashgani, Jizzaxda “KamAZ”ga ortilgan ortiqcha yuk ag‘darilgani, Toshkentda tezlikni oshirgan Cobalt yo‘l chetidagi beton ustunga borib urilgani to‘g‘risida xabar berilgandi.
Izoh (0)