Buxoro davlat tibbiyot instituti dekani o‘rinbosari fuqaroning o‘qishini ko‘chirib berish evaziga olgan puli o‘rniga Spark avtomashinasini rasmiylashtirib berayotganda qo‘lga olindi. Holat Bosh prokuratura huzuridagi departamentning viloyat boshqarmasi tomonidan aniqlandi, deya xabar bermoqda “Daryo” muxbiri.
Ta’kidlanishicha, departament xodimlari tomonidan fuqaro M.R.ning arizasiga ko‘ra, tadbir uyushtirilgan. Arizaga ko‘ra, fuqaro M.R. Qozog‘iston Respublikasidagi tibbiyot oliygohida o‘qiydigan o‘g‘li R.ning o‘qishini Buxoro davlat tibbiyot institutiga ko‘chirish istagi borligini bildirgan. Institut dekani o‘rinbosari R.R. oliygohda faoliyat yuritib kelayotgan N. va F. ismli xodimlar bilan oldindan til biriktirib, fuqaroning o‘qishini ko‘chirib berishga tayyor ekanligini bildirgan. Va buning evaziga M.R.dan 12 ming dollarni pora tariqasida olib, o‘z ehtiyojlariga sarflab yuborgan.Fuqaro M.R. esa oradan vaqt o‘tib, oliygoh mas’ullaridan bergan pullarini qaytarib berishini talab qilgan. Ular esa olgan 12 ming dollari evaziga F. boshqaruvidagi Spark rusumli avtomashinani Buxoro shahridagi “Shayx” restorani oldida M.ga topshirayotgan vaqtda qo‘lga olingan.
Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)