Бухоро давлат тиббиёт институти декани ўринбосари фуқаронинг ўқишини кўчириб бериш эвазига олган пули ўрнига Spark автомашинасини расмийлаштириб бераётганда қўлга олинди. Ҳолат Бош прокуратура ҳузуридаги департаментнинг вилоят бошқармаси томонидан аниқланди, дея хабар бермоқда «Дарё» мухбири.
Таъкидланишича, департамент ходимлари томонидан фуқаро М.Р.нинг аризасига кўра, тадбир уюштирилган. Аризага кўра, фуқаро М.Р. Қозоғистон Республикасидаги тиббиёт олийгоҳида ўқийдиган ўғли Р.нинг ўқишини Бухоро давлат тиббиёт институтига кўчириш истаги борлигини билдирган. Институт декани ўринбосари Р.Р. олийгоҳда фаолият юритиб келаётган Н. ва Ф. исмли ходимлар билан олдиндан тил бириктириб, фуқаронинг ўқишини кўчириб беришга тайёр эканлигини билдирган. Ва бунинг эвазига М.Р.дан 12 минг долларни пора тариқасида олиб, ўз эҳтиёжларига сарфлаб юборган.Фуқаро М.Р. эса орадан вақт ўтиб, олийгоҳ масъулларидан берган пулларини қайтариб беришини талаб қилган. Улар эса олган 12 минг доллари эвазига Ф. бошқарувидаги Spark русумли автомашинани Бухоро шаҳридаги «Шайх» ресторани олдида М.га топшираётган вақтда қўлга олинган.
Мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари ўтказилмоқда.
Изоҳ (0)