Ijtimoiy tarmoqlarda Andijon shahridagi Bog‘ishamol daha yo‘l halqasida joylashgan Bobur nomidagi madaniyat va istirohat bog‘ida 4-iyun kuni “Sakkizoyoq” attraksionida uchayotgan bola yerga yiqilib tushgani aks etgan videolavha tarqaldi. Sanoat xavfsizligi davlat qo‘mitasi holat yuzasidan rasmiy munosabat bildirdi.
Qayd etilishicha, hodisa yuzasidan o‘rganish ishlari o‘tkazilgan. Natijada 5 yoshli Z.SH. onasi bilan mazkur bog‘ hududidagi “Sakkizoyoq” attraksionida uchayotganda attraksion to‘xtash vaqtidan oldin tushib, ehtiyotsizlik oqibatida yengil tan jarohati olgani ma’lum bo‘lgan. Attraksion operatorlari bolaga tibbiy yordam ko‘rsatish maqsadida shifoxonaga olib borgan.
Jabrlanuvchining ahvoli qoniqarli deb topilgani sababli bolaga uyga javob berilgan.
“Z.SH. oilasining bog‘ ma’muriyatiga hech qanday e’tirozi yo‘q. Attraksion tegishli sinovdan, operator esa maxsus kursdan o‘tgan”, — deyiladi xabarda.
Eslatib o‘tamiz, O‘zbekistondagi nosoz attraksionlarning eng ko‘pi Andijonda joylashgan.
Izoh (0)