Rossiyaning “ZUMK” kompaniyasi O‘zbekistondagi “Dehqonobod kaliy zavodi”dan (DKZ) 18 mln dollar undirdi. Bu haqda Kommersant xabar berdi.
“ZUMK” vakillari sudlanuvchining qarzni ixtiyoriy ravishda to‘lashiga shubha qilmoqda. Ularning fikricha, bu borada Rossiya va O‘zbekiston hukumatlari kelishib olishlari mumkin. Mutaxassislarga ko‘ra, qaror ijrosi kechiktirilishi mumkin.
2020-yilda “ZUMK” “Dehqonobod kaliy zavodi’’ davlat korxonasidan 33,4 mln dollar undirish to‘g‘risida Rossiya Savdo-sanoat palatasi huzuridagi Xalqaro tijorat arbitraj sudiga ariza bilan murojaat qilgan.
O‘zbekistonda kompaniya DKZ uchun kaliy zavodi qurayotgan edi. Ob’ektning birinchi bosqichi bo‘yicha shartnoma 2007-yilda tuzilgan bo‘lib, uning miqdori 56 mln dollarni tashkil etgan.
Silvinit rudasini qazib olishni tashkil etish bo‘yicha tajriba-sinov ishlarida Perm kompaniyasi ham jalb qilingan. 2011-yilda “ZUMK” O‘zbekiston tomoni bilan zavodning ikkinchi bosqichini va tajriba-sinov ishlarining yangi bosqichini qurish bo‘yicha shartnoma imzoladi.
Rossiya kompaniyasi ob’ektdagi ishlarning umumiy qiymatini 122 mln dollardan ortiq deb baholagan.
2012-yilda zavodda avariya yuz bergan, shundan so‘ng shaxtalardan birini suv bosishi xavfi paydo bo‘lgan. Uning oqibatlarini bartaraf etishda ZUMK mutaxassislari ishtirok etgan.
Tomonlar moliyaviy munosabatlarni savdo vakolatxonalari, Rossiya Sanoat va savdo vazirligi va O‘zbekiston Vazirlar Mahkamasi darajasida tartibga solishga harakat qilgan.
Shu bilan birga, tomonlar sudlarda munosabatlarni tartibga solgan. Toshkent shahar sudlari tajriba-sinov ishlari bo‘yicha tuzilgan shartnomalarni haqiqiy emas deb topgan, natijada “ZUMK” pul olmagan.
2018-yilda “ZUMK” kompaniyasiga nisbatan bankrotlik to‘g‘risidagi ish yuritish tartibi joriy etilgan.
2019-yilda arbitraj sudi bankrotlik bo‘yicha DKZning Rossiya kompaniyasiga 6,1 mln dollardan ortiq qarzini tiklash to‘g‘risidagi arizasini qanoatlantirgan.
Endi ro‘yxatga olingan kreditorlar oldidagi qarz miqdori qariyb 1 milliard rublni tashkil etadi.
Da’volar ikkala kompaniya tomonidan Rossiya Savdo-sanoat palatasida Xalqaro tijorat arbitrajiga taqdim etilgan.
“Dehqonobod kaliy zavodi” aksiyadorlik jamiyatining qarshi da’volari qariyb 200 mln dollarni tashkil etadi. Unga ko‘ra, “ZUMK” loyihalashda xatolikka yo‘l qo‘ygan, ishlarning narxini oshirib ko‘rsatgan.
Rossiya korxonasi bajarilgan ishlar, baxtsiz hodisani bartaraf etish uchun qarzlarni, shuningdek, uni vaqtida to‘lamaganlik uchun jarima undirdi.
Natijada har ikki tomonning da’volari qisman qanoatlantirildi. Sud DKZdan 18 million dollardan ortiq mablag‘ undirdi, shuningdek, O‘zbekiston kompaniyasi “ZUMK” bilan shartnomani to‘g‘ri bekor qilganini tan oldi.
Izoh (0)