Ижтимоий тармоқларда Андижон шаҳридаги Боғишамол даҳа йўл ҳалқасида жойлашган Бобур номидаги маданият ва истироҳат боғида 4 июнь куни «Саккизоёқ» аттракционида учаётган бола ерга йиқилиб тушгани акс этган видеолавҳа тарқалди. Саноат хавфсизлиги давлат қўмитаси ҳолат юзасидан расмий муносабат билдирди.
Қайд этилишича, ҳодиса юзасидан ўрганиш ишлари ўтказилган. Натижада 5 ёшли З.Ш. онаси билан мазкур боғ ҳудудидаги «Саккизоёқ» аттракционида учаётганда аттракцион тўхташ вақтидан олдин тушиб, эҳтиётсизлик оқибатида енгил тан жароҳати олгани маълум бўлган. Аттракцион операторлари болага тиббий ёрдам кўрсатиш мақсадида шифохонага олиб борган.
Жабрланувчининг аҳволи қониқарли деб топилгани сабабли болага уйга жавоб берилган.
«З.Ш. оиласининг боғ маъмуриятига ҳеч қандай эътирози йўқ. Аттракцион тегишли синовдан, оператор эса махсус курсдан ўтган», — дейилади хабарда.
Эслатиб ўтамиз, Ўзбекистондаги носоз аттракционларнинг энг кўпи Андижонда жойлашган.
Изоҳ (0)