Un va g‘alla mahsulotlarini ochiq birja savdolarida sotish uchun yaratilgan sharoitlar bilan yaqindan tanishtirish maqsadida 7-iyun kuni O‘zbekiston tovar-xomashyo birjasiga press-tur tashkil etildi. Tadbir avvalida tashkilot rahbariyati va soha mutaxassislari ishtirokida matbuot anjumani o‘tkazildi. Bu haqda “Daryo” muxbiri xabar bermoqda.
Ta’kidlanishicha, davlat rahbarining “G‘allani yetishtirish va sotishda bozor tamoyilini joriy etishning qo‘shimcha chora-tadbirlari to‘g‘risida”gi qaroriga asosan, un mahsulotlari 2022-yil 1-iyundan, g‘alla mahsulotlari esa 1-iyuldan boshlab ochiq birja savdolariga qo‘yilishi belgilangan.
“G‘allachilikda bozor mexanizmlari joriy etilishidan ko‘zlangan asosiy maqsad: bug‘doy va un mahsulotlari uchun narxlarning barqarorligini ta’minlashdan iborat. O‘z navbatida mahsulotlar uchun narxlar barqarorligiga erishishning eng samarali usuli bu talab va taklif mutanosibligini ta’minlash hisoblanadi. Shaffof birja savdolari esa mana shunday imkoniyatlarni taqdim etadi.
Mazkur vazifalarni ijro etish doirasida O‘zbekiston tovar-xomashyo birjasida zarur shart-sharoitlar yaratilgan. Xususan, bug‘doy mahsulotlarini birja orqali sotishda fermerlar belgilangan birja komission to‘lovlari va garov mablag‘larini kiritishdan ozod etiladi.
Bug‘doyning birja orqali tumanlarda samarali sotilishini yo‘lga qo‘yish maqsadida 20 mingdan ziyod fermerlar o‘qitildi. Shuningdek, ular birjada elektron raqamli imzo orqali soddalashtirilgan tartibda ro‘yxatdan o‘tkazilib, brokerlik idoralariga biriktirildi”, — dedi O‘zbekiston tovar-xomashyo birjasi bosh makleri Islombek Ibragimov.
Uning qayd etishicha, O‘zbekiston tovar-xomashyo birjasida faoliyat yuritayotgan brokerlar sonini ko‘paytirish maqsadida birja mutaxassislari tomonidan Savdo-sanoat palatasining qariyb 200 nafar xodimlari va fermerlarning 500 dan ziyod hisobchilari brokerlikka o‘qitilgan va birjada broker sifatida ro‘yxatdan o‘tkazilgan.
Izoh (0)