Ukraina agar Rossiya Qora dengizdagi portlarda qurshovni bekor qilmasa, jahon oziq-ovqat taqchilligiga duch kelishidan ogohlantirdi. Dengizdan boshqa yo‘llar bilan umumiy don zaxirasining faqat bir qismini yetkazib berish mumkin. Bu haqda Financial Times xabar bermoqda.
Ukraina infratuzilma vaziri Oleksandr Kubrakov Financial Times gazetasiga bergan intervyusida boshqa yo‘llar bilan oziq-ovqat yetkazib berish Qora dengiz portlari orqali amalga oshirish mumkin bo‘lgan ishlarning 20 foizini ham qamrab olmasligini aytdi.
Ukraina va uning g‘arbiy ittifoqchilari mamlakatdan 20 mln tonnagacha don olib chiqish va bu yilgi hosil uchun omborxonalarini bo‘shatish yo‘llarini qidirmoqda.
Oziq-ovqat inqirozi Yaqin Sharq va Afrika mamlakatlarida Ukrainaning don mahsulotlariga tayanadigan o‘n millionlab odamlarga tahdid solmoqda.
Yuk mashinalari Polsha va Ruminiya bilan chegarada uzoq kechikishlarga duch kelyapti. Rossiya bir necha bor muqobil olib boradigan yo‘llarni bombardimon qildi.
Fevral oyi oxiridan beri Rossiya bosib olingan hududlardan 400 mingdan 500 ming tonnagacha donni tortib oldi. Ukrainaning ba’zi fermer xo‘jaliklari havo hujumlari va artilleriya otishmalariga uchragan.
Rossiya prezidenti Vladimir Putin oziq-ovqat inqirozini Rossiya eksportiga qo‘yilgan sanksiyalar bilan izohladi va Moskva cheklovlar olib tashlangan taqdirdagina dengiz qurshovini tugatishini aytdi.
Juma kuni Putin davlat televideniyesiga bergan intervyusida Ukrainadan don eksport qilish muammosi mavjud emasligini aytgan.
Kubrakov Rossiyaning xatti-harakatlari global miqyosda ocharchilikni keltirib chiqarishi xavfi borligi va Moskva “umumiy qaroqchilar” kabi harakat qilayotgani haqida ogohlantirdi.
Kubrakovning ta’kidlashicha, yagona temir yo‘l liniyasini Yevropa Ittifoqi standartiga o‘tkazish 2-3 mlrd dollarga tushadi, chegara o‘tish joylarining o‘tkazish qobiliyatini kengaytirish uchun ko‘proq investitsiyalar kerak bo‘ladi.
Yangi yo‘nalishlar bo‘yicha eksport salohiyati ortib borayotgan bo‘lsa-da, Yevropa Ittifoqi diplomatlarining hisob-kitoblariga ko‘ra, Ukraina yoz oxirigacha bor-yo‘g‘i 5 million tonnaga yaqin g‘alla eksport qilishi mumkin.
Bu esa oxirgi hosilning qolgan qismini chirish xavfi ostida qoldiradi va bu yilgi hosilni saqlashni qiyinlashtiradi.
Birlashgan Millatlar Tashkiloti bosh kotibi Antoniu Guterrish Qora dengiz portlarini blokdan chiqarish va Rossiyadan tijoriy yuk tashishga hujum qilmaslik kafolatlarini olish uchun harakat qilmoqda.
Avvalroq global oziq-ovqat narxining o‘sishi rivojlanayotgan bozorlar uchun xavflarni kuchaytirayotgani haqida xabar berilgan edi.
Izoh (0)