Samarqand viloyatining Jomboy tumani “To‘qqizboy” mahallasidagi “Ohalik oltin bog‘i mevasi” MCHJga tegishli intensiv bog‘ va dala ekinlari fotoelektr stansiyasi yordamida sug‘orilmoqda. Sug‘orish tizimi quvvati 60 kVt bo‘lgan quyosh fotoelektr stansiyasi orqali amalga oshirilmoqda.
100 gektar yer maydoniga ega bo‘lgan mazkur maskanda turli xildagi mevali daraxt ko‘chatlari hamda qulupnay yetishtiriladi. Shu yerda faoliyat olib boruvchi agronom Nasim To‘raqulovning aytishicha, salkam o‘n yildan buyon dala ekinlari tomchilab sug‘orilmoqda.
“Yer maydonimiz 100 gektar. Biz daraxt ko‘chatlarini yetkazib beramiz. Shundan 10 gektari qulupnay hisoblanadi. Yerimizning barchasiga ko‘chat ekilgan. Biz o‘n yildan buyon ekinlarni tomchilab sug‘oramiz. Barcha bog‘larimiz tomchilab sug‘oriladi. Tomchilab sug‘orish suvni tejaydi va suvsizlik muammosini bartaraf etadi. Tomchilab sug‘orish natijasida bir gektar yerga ketadigan suvning to‘rtdan biri orqali mahsulotlarni sug‘orib olsa bo‘ladi”, — deydi Nasim To‘raqulov.
Fermer xo‘jaligi yerida quyosh fotoelektr stansiyasi ishga tushirilgandan so‘ng tadbirkor yiliga 43,2 ming kVt soat, ya’ni 20 million so‘mlik elektr energiyasini tejamoqda.
“Bizda 220 ta quyosh batareykasi bor. Ular orqali bitta suv nasosimizni ishlatamiz. Yuz gektar yerning 35 gektari aynan quyosh batareykasi orqali ishlaydigan suv nasosimiz orqali tomchilab sug‘oriladi. Aynan ushbu suv nasosiga davlatdan keladigan elektr tokini ishlatmaymiz. Qulaylik jihati shundaki, qurish pullik bo‘lishi mumkin, ammo qolganiga hech nima xarajat qilmaysiz”, — deydi Nasim To‘raqulov.
Fermer xo‘jaligida suvchi bo‘lib ishlaydigan Orzu Yormatovning aytishicha, ekinlar tomchilab sug‘orishga o‘tilganidan so‘ng ishi ancha yengillashgan. Quyosh fotoelektr stansiyasining qurilishi esa, elektr energiyasi uzilib qolganda juda qo‘l kelayotganligini bildirdi.
“Biz shu yerda suvchi bo‘lib ishlaymiz. Bitta tugmani bosish orqali yuz gektar yerlarni bemalol sug‘ora olamiz. Ishimiz yengil. Quyosh batareykasidan asosan suvda foydalanamiz. Juda energiya tejaydi. Elektr toki bo‘lmaganda quyosh batareykasi orqali hovuzimizni to‘ldiramiz. Hovuzimiz 25-30 tonnagacha suvni qabul qiladi. Bir soatda to‘ladi. O‘sha suv kuni bilan ishlatishga yetadi”, — deydi Orzu Yormatov.
“Besh-olti yildan buyon, aniqrog‘i bog‘ tashkil qilingan beri ekinlarimizni tomchilab sug‘oramiz. Zamonaviy uskunamiz suvni filtrlab, so‘ng shlanglarga uzatadi. O‘zim to‘rt yildan buyon shu yerda ishlayman. Yildan-yilga texnikalar rivojlanib borib, hamma narsa qulay bo‘lib bormoqda”, — deydi yana bir suvchi Alisher Qilichov.
Quyosh fotoelektr stansiyasining ishga tushirilishi yoqilg‘i-energetika resurslarini tejash va uzluksiz elektr ta’minotini amalga oshirishda muhim ahamiyat kasb etadi.
“‘Ohalik oltin bog‘i mevasi’ MCHJning asosiy faoliyati ko‘chatchilik hisoblanadi. Hozirgi kunda bu yerda doimiy ish bilan ta’minlanganlar 16 nafarni tashkil etadi. Bundan tashqari kunlik ishlarga 150 nafarga yaqin ishchilar jalb qilinadi. Bu yerda dehqonchilik innovatsion usulda olib boriladi”, — deydi Jomboy tumani “To‘qqizboy” MFY hokim yordamchisi Ozodjon Omonov.
Eslatib o‘tamiz, Samarqand viloyatining Nurobod tumani hududida qayta tiklanuvchi energiya manbalari asosida elektr energiyasi ishlab chiqaradigan ikkinchi yirik quyosh fotoelektr stansiyasi barpo etilmoqda. Fransiyaning Total Eren kompaniyasi bilan davlat-xususiy sheriklik tamoyili asosida hayotga tatbiq etilayotgan ushbu loyiha poydevori davlat rahbarining 2018-yil oktabr oyida Fransiyaga tashrifi davomida qo‘yilgan.
Izoh (0)