Qashqadaryo viloyatining Dehqonobod tumanida 8 bosh yovvoyi quyon ovlagan shaxs sud qarori bilan salkam 5 million so‘m jarima to‘laydigan bo‘ldi. Bu haqda tuman hokimligi axborot xizmati xabar berdi.
Ma’lum qilinishicha, 2022-yilning 1-may kuni Dehqonobod tumanining “Nodira” mahallasida yashovchi fuqaro A.M. ov quroli bilan 8 bosh yovvoyi quyon ovlagan. Bu haqda tuman Ekologiya bo‘limi xabar topgach, holat yuzasidan o‘rganish ishlarini olib borgan.
“Avvalo shuni aytish kerakki, ushbu holat sodir bo‘lgan paytda Dehqonobod tumani Ekologiya bo‘limi tomonidan tegishli tashkilotlar ishtirokida belgilangan tartibda o‘rganish o‘tkazilib, hujjatlar rasmiylashtirilgan va ov qurollari qonuniy to‘xtamga kelingunga qadar vaqtincha daliliy ashyo sifatida olingan edi.
Jinoyat ishlari bo‘yicha Dehqonobod tuman sudi 2022-yil 31-may kuni mazkur ishni ko‘rib chiqib, fuqaro A.M.ga tegishli ikki dona ov qurolini musodara qilib, Ma’muriy javobgarlik to‘g‘risidagi kodeksining 90-moddasi, 4-qismi (ov qilish va baliq ovlash qoidalarini, shuningdek hayvonot dunyosidan foydalanishning boshqa turlarini amalga oshirish qoidalarini buzish) bilan unga bazaviy hisoblash miqdorining o‘n baravari miqdorida ma’muriy jarima qo‘llagan.
Shuningdek, hayvonot dunyosiga yetkazilgan 2 million 160 ming so‘m zarar ham fuqaro hisobidan undirilishi belgilangan”, — deyiladi hokimlik axborotida.
Izoh (0)