CNN: Yevroittifoq, AQSH va Britaniya urushni tugatish rejasini muhokama qilmoqda. Ukraina muzokaralarda bevosita qatnashmayapti

AQSH, Yevroittifoq va Buyuk Britaniya vakillari so‘nggi haftalar davomida muntazam uchrashuv o‘tkazib, Ukrainadagi urushni muzokaralar yo‘li bilan to‘xtatish rejasini muhokama qilmoqda. Bu haqda CNN bir nechta manbalariga tayanib xabar bermoqda, deb yozadi Meduza. Xususan, telekanal suhbatdoshlari so‘zlariga ko‘ra, Italiya rejasi muhokama qilinmoqda.

Ukraina bu muhokamalarda bevosita ishtirok etmayapti, bu esa AQSH hukumatining “Ukrainasiz Ukraina haqida hech narsa gapirilmaydi” mazmunidagi bayonotiga ziddir. Shu bilan birga, ta’kidlanishicha, AQSH ma’lum bir rejani talab qilib turib olib Ukrainaga bosim o‘tkazmaydi va uni Rossiya bilan muzokaralarga undamaydi.

Gap tinch yo‘l bilan tartibga solish rejasining taxminiy parametrlarini aniqlash va uni keyinchalik muhokama qilish uchun Ukrainaga taklif qilish haqida bormoqda, deb yozadi CNN. Biroq telekanal manbalari Ukraina o‘z hududlaridan voz kechishini ko‘zda tutadigan qandaydir kelishuvlarga tayyorligiga shubha bildirdi. Ayni vaqtda CNN’ning ikki manbasi AQSH aslida Italiyaning Qrim va Donbassning to‘liq muxtoriyatini nazarda tutuvchi rejasini qo‘llab-quvvatlamasligini aytgan.

AQSH va uning ittifoqchilari olib borayotgan muhokama muzokaralarga olib kelish-olib kelmasligi hozircha noma’lum. CNN qayd etishicha, AQSH hukumati hozircha nizoni diplomatik yo‘l bilan hal qilishning real istiqbollarini ko‘rmayapti. Ukraina va Rossiya ham jiddiy muzokaralarga ko‘p qiziqish bildirmayapti.

Eslatib o‘tamiz, may oyida Italiya hukumati Ukrainadagi urushni tugatish imkonini beruvchi rejani tayyorlagan edi.

Tinch yo‘l bilan tartibga solish jarayonini Italiya to‘rtta bosqichda amalga oshirishni taklif qilmoqda:

• Birinchi bosqich — o‘t ochishni to‘xtatib, front chizig‘idan qo‘shinlarni olib ketish.
• Ikkinchi bosqich — Ukrainaning NATOga qo‘shilmasligi kafolatlangan holda, Yevroittifoqqa a’zo bo‘lishi (bir qator qo‘shimcha shartlar va majburiyatlar bilan).
• Uchinchi bosqich — Qrim va Donbass bo‘yicha Ukraina va Rossiya o‘rtasidagi ikki tomonlama kelishuv. Italiya rejasi “bahsli hududlar” to‘liq muxtoriyatga ega bo‘lishini nazarda tutadi, shu jumladan, o‘z xavfsizligini ta’minlash sohasida, ammo ayni vaqtda Ukraina suvereniteti saqlanib qoladi.
• To‘rtinchi bosqich — Yevropada tinchlik va xavfsizlik haqida ko‘p tomonlama bitim tuzish.