Yevroittifoq Rossiyaga qarshi sanksiyalarning oltinchi paketi doirasida “Yandeks” kompaniyasi asoschisi Arkadiy Volojni sanksiya ro‘yxatlariga kiritdi, deb yozadi Meduza.
Bu e’lon qilinganidan keyin yarim soat o‘tib, kompaniya Arkadit Voloj “Yandeks” kompaniyalar guruhi direktorlar kengashini va bosh direktor lavozimini tark etishini ma’lum qildi. Shuningdek, Voloj “Yandeks”ning sho‘ba xalqaro kompaniyalaridagi rahbarlik lavozimlaridan ham ketadi.
“Bu qarorni xato va oxir-oqibat foydasiz deb hisoblasam-da, sanksiyalar amal qilayotgan vaqtda oilaviy fondimga qandaydir ko‘rsatmalar bermoqchi emasman. Bu vaqt mobaynida trast direktorlar kengashi tavsiyalariga muvofiq ovoz beradi. Bu qaror kompaniya va uning aksiyadorlari manfaatlariga javob beradi, ammo men kompaniyaga iloji bo‘lgan sohada yordam berishda davom etaman”, — deya kompaniya o‘z press-relizida Volojning bayonotini keltirdi.
Volojning sanksiyalar ro‘yxatiga kiritilishi haqidagi yangiliklar fonida “Yandeks” aksiyalari birjada 10 foizdan ko‘proqqa tushib ketdi.
Shaxsiy sanksiyalarga tushgan boshqa odamlar orasida “Milliy media guruhi” direktorlar kengashi raisi Alina Kabayeva, “Roskomnadzor” rahbari Andrey Lipov, Rossiya prezidenti matbuot kotibining qizi Yelizaveta Peskova va rafiqasi Tatyana Navka, Xerson viloyati “yangi ma’muriyati” rahbari va uning o‘rinbosari Vladimir Saldo va Kirill Stremousov, shuningdek, Yevroittifoq Buchada tinch aholi o‘ldirilishiga aloqador deb hisoblaydigan 64-alohida motoo‘qchilar brigadasining 40 dan ortiq harbiy xizmatchilari bor.
Sanksiya ro‘yxatlariga jami 60 dan ziyod jismoniy shaxs va 18 ta kompaniya, xususan, “UAZ”, “KamAZ”, “Voyentorg” va “Suxoy” qo‘shildi.
Izoh (0)