Наманганда жорий йилнинг 16—29 май кунлари бўлиб ўтган сайловларда маҳалла раисларининг 332 нафари ёки 42 фоиз қайта сайланди. Бу ҳақда вилоят Маҳалла ва оилани қўллаб-қувватлаш бошқармаси бошлиғи Аҳмаджон Аълохўжаев маълум қилди, дея хабар беради «Дарё» мухбири Азизбек Абдувалиев.
Сайловларда аҳоли томонидан маъқулланган номзодларнинг 450 нафари ёки 58 фоизи илк маротаба маҳалла раислигига сайланганлар ҳисобланади.
«Ваколатини топширган собиқ маҳалла раисларини ҳам унутиб қўйганимиз йўқ. Жойларда уларни тўплаб, дастурхон ёзиб, миннатдорлигимизни билдиряпмиз, қилган меҳнатларини эътироф этяпмиз. Янги раисларга кўмак ва маслаҳат беришларини сўраяпмиз», — дейди Аҳмаджон Аълохўжаев.
Қайд этилишича, янги сайланган маҳалла раисларининг 230 нафари ёки қарийб 30 фоизи ўқитувчилар. 113 нафари ёки 14,5 фоизи аёллардан иборат. 18 нафари халқ депутатлари вилоят, шаҳар ва туманлар кенгашлари депутатлари.
«Сайловлар очиқ-ошкора ва адолатли ўтиши учун барча саъй-ҳаракатлар қилинди. Сайлов жараёнлари оммавий ахборот воситалари ёки ижтимоий тармоқлар орқали тўғридан-тўғри эфирга узатилган ҳолатлар ҳам кўп бўлди», — дейди Аҳмаджон Аълохўжаев.
Маълумот учун, Наманганда янги сайланган маҳалла раисларининг 747 нафари ёки 95 фоиздан ортиғи олий маълумотли ҳисобланади.
Изоҳ (0)