Россияда 2022 йилнинг апрель ойида 19,9 минг дона автомобиль ишлаб чиқарилган. Бу кўрсаткич ўтган йилнинг шу даврига нисбатан 85,4 фоизга камдир. Бу ҳақида Росстат хабар берди.
2021 йил апрель ойида қатъий ковид чекловлари амал қилган ва кўплаб заводлар ишламай қолган эди. Кейин мамлакатда 136 мингга яқин автомобиль ишлаб чиқарилган.
Апрель ойидаги ишлаб чиқариш кўрсаткичи март ойига нисбатан 53,1 фоизга кам. Жорий йилнинг дастлабки тўрт ойида ишлаб чиқаришни давом эттираётган Россия автомобиль заводлари 264 минг дона енгил автомобиль ишлаб чиқарди, бу 2021 йилга нисбатан 47,4 фоизга кам.
Россияда юк машиналари ишлаб чиқариш ҳам камайди. Жумладан, ўтган ойда 12,3 мингта оғир юк автомобиллари йиғилди, бу 2021 йилнинг апрелига нисбатан 30,4 фоизга, 2022 йилнинг мартига нисбатан 13,2 фоизга камдир.
2022 йил март ойи бошида бир қатор йирик хорижий автомобиль ишлаб чиқарувчилари Россиядаги фаолиятини вақтинчалик тўхтатганини эълон қилди.
Шундай қилиб, компаниялар Россия заводларида автомобиль ишлаб чиқаришни ва маҳаллий дилерларга янги автомобилларни етказиб беришни тўхтатди. Бу қарор дунёдаги мураккаб геосиёсий вазият ва таъминот занжирларининг носозлиги билан изоҳланди.
Апрель ойида Россия автомобиль бозори ҳам антирекордни янгилади. Янги автомобиллар сотуви 78,5 фоизга камайиб, атиги 32 702 донани ташкил этди.
Бу Ўзбекистонга қандай таъсир қилади?
Россия кўп йиллардан бери Ўзбекистондаги асосий автомобиль импортчиларидан бири бўлиб келган.Масалан, 2021 йилда Россия Ўзбекистонга 4 539 дона автомобиль импорт қилиб, энг йирик импортчилар учлигига кирган.
Аммо Украиндаги уруш бошлангандан кейин Россияда автомобиль заводларининг фаолияти тўхтаб қола бошлади.
Бунинг натижасида Ўзбекистон Россиядан машина сотиб олишни кескин камайтирди — агар ўтган ойларда мамлакатдан уч юз дона автомобиль олиб келинган бўлса, апрель ойида бу кўрсаткич бор-ёғи 107 та бўлган.
Илгари Россия Ўзбекистонга олиб кириладиган автомобильлар сони бўйича Хитой ва Жанубий Кореядан кейин учинчи ўринда бўлган бўлса, ҳозир бу ўринни Қозоғистонга бой бериб қўйди.
2020 йили «Узавтосаноат» ва «Volkswagen Group Rus» Volkswagen ва Škoda автомобилларининг йиғувини йўлга қўйган эди.
2021 йилдан бери Жиззах вилоятида Lada Vesta SW, XRAY ва Largus автомобиллари йиғилади.
Бу лойиҳалар ҳам уруш туфайли сўроқ остида қолди.
Изоҳ (0)