Qirg‘izistonning sobiq prezidenti Almazbek Atambayevga yangi ayblovlar qo‘yildi, deb yozmoqda “24.kg”.
Atambayev 2010-yilning iyunida yuz bergan to‘qnashuvlar bo‘yicha jinoiy ishda ayblanmoqda, dedi uning advokati Sergey Slesarev. “Almazbek Atambayev gumonlanayotganlik to‘g‘risidagi bildirishnomani olish va hujjatlarni imzolash bilan bog‘liq barcha tergov harakatlarida ishtirok etishdan bosh tortdi”, — deya qo‘shimcha qildi advokat.
Avvalroq Atambayev kriminal avtoritet Aziz Batukayevni ozod qilishda korrupsiyaga yo‘l qo‘yganlikda ayblanib, 11 yilga qamalgan edi. U, shuningdek, korrupsiya, noqonuniy boylik orttirish, 2019-yilda hokimiyatni tortib olish uchun tarafdorlarining prezident qarorgohiga bostirib kirishini tashkillashtirish va maxsus bo‘linma askarini o‘ldirishda ayblanmoqda. Sobiq prezident o‘ziga qo‘yilgan barcha ayblovlar siyosiy motivda ekanini ta’kidlaydi.
2010-yilning iyun oyida Qirg‘iziston janubidagi O‘sh viloyatida qirg‘iz-o‘zbek aholisi o‘rtasida to‘qnashuvlar yuz bergan. Rasmiy ma’lumotlarga ko‘ra, o‘shanda 400 dan ortiq, norasmiy ma’lumotlarga ko‘ra ikki mingdan ortiq odam halok bo‘lgan. Tartibsizliklar prezident Qurmanbek Bakiyev ag‘darilganidan ikki oy o‘tib sodir bo‘lgan. Atambayev o‘shanda muvaqqat hukumat tarkibida edi.
Mavzuga doir:
- Qirg‘izistonda sobiq prezident Atambayev ishtirok etgan tartibsizliklar ishi bo‘yicha sud boshlandi
- Qirg‘iziston sobiq prezidenti Almazbek Atambayevga hokimiyatni kuch bilan egallashga urinish ayblovi e’lon qilindi
- Almazbek Atambayev Turkiya fuqarolariga noqonuniy ravishda Qirg‘iziston pasportlarini berishda gumon qilinmoqda
Izoh (0)