Italiya hukumati rahbari Mario Dragi Yevropa Ittifoqi Kengashining iyun oyida bo‘lib o‘tadigan yig‘ilishida Ukrainaga YIga nomzod maqomi berilmasligini ma’lum qildi, deb yozmoqda ANSA.
“Yevropa Ittifoqining deyarli barcha yirik davlatlari Ukrainaga YIga nomzod maqomini berishga qarshi”, — dedi Dragi Yevropa Ittifoqi sammitidan keyin uyushtirilgan matbuot anjumanida.
U Italiyaning ushbu masaladagi pozitsiyasi boshqacha ekanini ta’kidladi. “Biz nomzod maqomini so‘rashimiz mumkin, ammo bir qator mamlakatlarning qarshiligi tufayli hozir bu kutilmayapti”, — dedi u.
Dragining ta’kidlashicha, shu bilan birga Ukrainaga Yevrokomissiya tomonidan ishlab chiqilishi kerak bo‘lgan “tezlashtirilgan tartib bo‘yicha” YIga a’zolikka tayyorlanish imkoniyati berilishi mumkin.
31-may kuni Yevropa Ittifoqi kengashi Ukrainadagi vaziyat bo‘yicha keng qamrovli hujjatni e’lon qildi. Xususan, unda shunday deyilgan: “Yevropa Ittifoqi Kengashi Komissiyaning Ukraina, shuningdek, Moldova Respublikasi va Gruziyaning Yevropa Ittifoqiga a’zo bo‘lish haqidagi arizasi bo‘yicha xulosalarini tayyorlashni e’tiborga oladi. Iyundagi yig‘ilishda bu masalaga qaytadi”.
Ukraina Rossiya bosqini boshlanganidan bir necha kun o‘tib YIga qo‘shilish uchun ariza berdi. Yevropa komissiyasi va YIga a’zo qator davlatlar, jumladan, Polsha vakillari Ukrainani uning arizasi imkon qadar tezroq ko‘rib chiqilishiga ishontirdi.
O‘z navbatida, Fransiya prezidenti Emmanuel Makron Ukrainaning YIga qo‘shilish jarayoni ko‘p yillar davom etishini aytib, Ukrainani ham o‘z ichiga oladigan “Yevropa siyosiy hamjamiyatini” yaratish g‘oyasini ilgari surdi. Ukraina rasmiylari bu fikrni qo‘llab-quvvatlamadi.
Izoh (0)