Қирғизистон собиқ президенти Атамбаевга янги айбловлар қўйилди

Қирғизистоннинг собиқ президенти Алмазбек Атамбаевга янги айбловлар қўйилди, деб ёзмоқда «24.kg».

Атамбаев 2010 йилнинг июнида юз берган тўқнашувлар бўйича жиноий ишда айбланмоқда, деди унинг адвокати Сергей Слесарев. «Алмазбек Атамбаев гумонланаётганлик тўғрисидаги билдиришномани олиш ва ҳужжатларни имзолаш билан боғлиқ барча тергов ҳаракатларида иштирок этишдан бош тортди», — дея қўшимча қилди адвокат.

Аввалроқ Атамбаев криминал авторитет Азиз Батукаевни озод қилишда коррупцияга йўл қўйганликда айбланиб, 11 йилга қамалган эди. У, шунингдек, коррупция, ноқонуний бойлик орттириш,  2019 йилда ҳокимиятни тортиб олиш учун тарафдорларининг президент қароргоҳига бостириб киришини ташкиллаштириш ва махсус бўлинма аскарини ўлдиришда айбланмоқда. Собиқ президент ўзига қўйилган барча айбловлар сиёсий мотивда эканини таъкидлайди.

2010 йилнинг июнь ойида Қирғизистон жанубидаги Ўш вилоятида қирғиз-ўзбек аҳолиси ўртасида тўқнашувлар юз берган. Расмий маълумотларга кўра, ўшанда 400 дан ортиқ, норасмий маълумотларга кўра икки мингдан ортиқ одам ҳалок бўлган. Тартибсизликлар президент Қурманбек Бакиев ағдарилганидан икки ой ўтиб содир бўлган. Атамбаев ўшанда муваққат ҳукумат таркибида эди.