“PSJ” Zinedin Zidanni olib kelish fikridan qaytmayapti. Parij klubi murabbiyga katta maosh taklif qiladi

“PSJ” prezidenti Nosir al-Helayfi yaqin kunlarda Parijda Zinedin Zidan bilan ko‘rishadi. Bu haqida jurnalist Adrien Grenye xabar qilmoqda.

Xabarga ko‘ra, “PSJ” 49 yoshli mutaxassisga yana bir bor jamoani boshqarish taklifini beradi. Parijliklar Zidan uchun yiliga 25 million yevro maosh to‘lashga tayyor.

Zinedin 2021-yil yozidan buyon ishsiz. Fransuz murabbiylik faoliyati davomida faqatgina “Real”ni boshqargan (tanaffuslar bilan 2016-yildan 2021-yilga qadar). Zidan madridliklar bilan 11 ta sovrin, shu jumladan ketma-ket 3 marta Chempionlar Ligasi kubogini qo‘lga kiritgan.

Avvalroq Antonio Konte “PSJ”da Maurisio Pochettinoning o‘rnini egallashi mumkinligi xabar qilingandi.

“PSJ” 2021/22-yilgi mavsum Fransiyada mamlakat chempionligini qo‘lga kiritdi, Fransiya Kubogi 1/8 finalida esa “Nitssa”ga penaltilar seriyasida mag‘lub bo‘lib, o‘z yurishini to‘xtatgan. Chempionlar Ligasining 1/8 finalida “Real” parijliklardan ustun kelgan.